UŞAQ EVLƏRİNDƏ BÖYÜYƏN UŞAQLARIN PROBLEMLƏRİ MÜZAKİRƏ EDİLMİŞDİR
Ombudsman Aparatından AZƏRTAC-a bildirmişlər ki, müvəkkil ölkəmizdə uşaq hüquqlarının həyata keçirilməsi, uşaq və gənclərin təhsili, yaradıcılıq qabiliyyətinin yüksəldilməsi üçün müxtəlif dərnəklərin yaradılması, bir sıra şəhər və rayonlarda gənclər üçün 20-dən artıq resurs mərkəzinin təşkil edilməsi və digər məsələlərlə bağlı YUNİSEF-in Azərbaycan hökumətinə göstərdiyi dəstək nəticəsində gənc nəslin problemlərinin öz həllini tapdığını qeyd etmişdir. E.Süleymanova xüsusi ehtiyacı olan, ağır xəstəliyə tutulmuş əlil uşaqlara, habelə valideyn himayəsindən məhrum, natamam ailələrdə böyüyən uşaqlara diqqətin artırılmasının vacibliyini vurğulamışdır.
K.Rossela uşaq evlərində yaşayan uşaqların problemlərindən söz açmış, bu tərbiyə müəssisələri sakinlərinin cəmiyyətdən qismən təcrid olunduğunu nəzərə çatdırmışdır. Azərbaycanda sosial xidmətin səmərəsinin yüksəldilməsinə ehtiyac olduğunu bildirən K.Rossela uşaq evlərində böyüyən balaların ailələrə verilməsinin zəruriliyini qeyd etmiş, ombudsmanın bu məsələyə müdaxiləsinin böyük səmərə verəcəyinə inandığını vurğulamışdır.
Ombudsman bu sahədə fəaliyyət planı işləyib hazırlamağı, prosesi həyata keçirmək üçün xüsusi şəbəkə yaratmağı, həmin işdə maraqlı olan şəxsləri bir araya toplamağı təklif etmişdir.
Bölmənin digər xəbərləri
