Uşaq nikahlarının qarşısının alınması tədbirlərinin gücləndirilməsi barədə təlim
Bakı, 7 noyabr, AZƏRTAC
Azərbaycan Respublikası Prezidentinin sərəncamları ilə təsdiq edilmiş dövlət proqramları və Təhsil Nazirliyinin müvafiq əmrlərinin icrası, eləcə də “Azərbaycan Respublikasında insan alverinə qarşı mübarizəyə dair 2020-2024-cü illər üçün Milli Fəaliyyət Planı”na əsasən uşaq nikahlarının qarşısının alınması tədbirlərinin gücləndirilməsi məqsədilə Təhsil Nazirliyi Respublika Uşaq-Gənclər İnkişaf Mərkəzinin təşəbbüsünə əsasən noyabrın 7-də onlayn platformada təlim keçirilib.
Mərkəzdən AZƏRTAC-a bildirilib ki, bu qurumun, Qafqaz Müsəlmanları İdarəsinin, Dini Qurumlarla İş Üzrə Dövlət Komitəsinin, Ailə, Qadın və Uşaq Problemləri üzrə Dövlət Komitəsinin, İnsan Hüquqları üzrə Müvəkkil (Ombudsman) Aparatının birgə əməkdaşlığı ilə təşkil edilən təlimin əsas məqsədi uşaq nikahlarının qarşısının alınmasına dair vətəndaşların maarifləndirilməsini genişləndirmək, onların gənc qız övladlarının hüquqlarının qorunmasında, təhsillərindən geri qalmamasında, savadsızlıq, xəstəliklər, ana və körpə ölümü, məişət zorakılığı, insan hüquqlarının pozulmasının qarşısının alınmasında fəal iştiraka, ümumtəhsil və məktəbdənkənar təhsil müəssisələrinin və valideyn komitəsinin əməkdaşlarının məsələyə diqqətinin cəlb edilməsidir.
Onlayn təlimi açan Təhsil Nazirliyi Respublika Uşaq-Gənclər İnkişaf Mərkəzinin direktoru Firuzə Sultanzadə mövzunun aktuallığını və vacibliyini vurğulayaraq, gələcəkdə bununla bağlı silsilə tədbir və təlimlərin davamlı şəkildə keçirilməsinin nəzərdə tutulduğunu bildirib. Qafqaz Müsəlmanları İdarəsinin sədr müavini Qəmərxanım Cavadlı, Dini Qurumlarla İş Üzrə Dövlət Komitəsinin Təhlil və proqnozlaşdırma şöbəsinin müdiri Elnarə Kərimova, Ailə, Qadın və Uşaq Problemləri üzrə Dövlət Komitəsinin Hüquqi Təminat şöbəsinin müdir müavini Seymur Məmmədov, İnsan hüquqları üzrə Müvəkkil (Ombudsman) Aparatının əməkdaşı Azər İsalı, Respublika Uşaq-Gənclər İnkişaf Mərkəzinin psixoloqu Günel Abdullayeva və müstəqil ekspert həkim-ginekoloq Nigar Əhmədova təqdimatlar keçirib, videoçarxlar nümayiş etdirib, məruzələrlə çıxış ediblər.
Onlayn təlimdə ölkənin şəhər və rayonlarında fəaliyyət göstərən 50-yə yaxın uşaq-gənclər inkişaf mərkəzlərinin direktorları və metodistləri, Bakı şəhəri üzrə 10 ümumtəhsil məktəbinin valideyn komitəsinin sədrləri iştirak ediblər.
Bölmənin digər xəbərləri
