Uşaqlar arasında yayılan dəri-zöhrəvi xəstəliklərin səbəbləri
Bakı, 25 aprel, AZƏRTAC
Son vaxtlar uşaqlar arasında bəzi dəri-zöhrəvi xəstəliklərin rastgəlinmə tezliyi artıb. Dərinin bəzi xəstəliklərinin əmələgəlmə səbəbi məlum olmadığı üçün onların müayinə və müalicəsinin stasionar şəraitdə aparılması tövsiyə olunur. Dərinin irsi və xroniki xəstəliklərinin müalicəsi həkim müayinəsindən sonra təyin olunur. Bir sıra dəri xəstəlikləri vaxtında müalicə olunmazsa, çox ciddi fəsadlar verə bilər.
AZƏRTAC xəbər verir ki, TƏBİB-in tabeliyində fəaliyyət göstərən Bakı Baş Səhiyyə Mərkəzinin 3 nömrəli Uşaq Dəri-Zöhrəvi Dispanserinin şöbə müdiri Huriyyə Qarayevanın dediyinə görə, son zamanlarda uşaqlar arasında bəzi dəri xəstəlikləri artıb: “Bunlara misal olaraq psoriaz, vitiligo, allergik dermatitlər, qoturluq, göbələk və bir sıra yoluxucu dəri xəstəliklərini göstərmək olar. Yoluxucu xəstəliklər olan qoturluq, göbələk daha çox yaz-yay aylarında müşahidə olunur. Göbələk xəstəlikləri, əsasən it-pişik kimi heyvanlardan, bölgələrdə isə daha çox mal-qaradan yoluxa bilər. Göbələk xəstələrində mütləq mikoloji müayinə aparılmalıdır”.
Həmin xəstəliklərlə əlaqədar hər hansı bir şübhə yaranarsa, dərhal həkim-dermatoloqa müraciət edilməlidir: “Yay aylarında daha çox tərləyən, immuniteti aşağı olan uşaqlar arasında ən çox rast gəlinən xəstəliklərdən biri də impetiqo xəstəliyidir. Bu xəstəliyin törədicisi olan stafilo-steptokokları ən çox dərinin açıq nahiyələrində müşahidə olunur. Xəstəlik vaxtında müalicə olunmazsa, ciddi fəsadlar verə bilər. Müalicəsində antihistamin, vitaminlər, antibiotik və xaricə məlhəmlərdən istifadə olunur”,- deyə şöbə müdiri bildirib.
N.Qarayeva deyib ki, dərinin irsi, xroniki xəstəliklərinin müalicəsi həkim müayinəsindən sonra təyin olunur: “Dərinin bəzi xroniki xəstəliklərində günəş şüasından qorunmaq lazımdır (vitiligo, allergik dəri xəstəliklərində və s.). Vitiligo - automin dəri patologiyasıdır, xəstəliyin əmələgəlmə səbəbləri müxtəlifdir. Xəstəlik dəriyə rəng verən melonin olmaması nəticəsində meydana gəlir, ləkələr ən çox dərinin açıq nahiyəsində yaranır. Xəstəliyin artmasının səbəbləri sırasında stres, günəş şüaları və travmanı göstərmək olar. Qarşısını almaq üçün stres, günəş şüalarından uzaq durmaq, qidalanmada pəhriz rejiminə ciddi əməl etmək lazımdır. Dəri xəstəliklərindən allergik dermatitlər bəzi dərman preparatları və qida maddələrindən sonra meydana gəlir. İlk növbədə xəstəliyi törədən səbəbləri aradan qaldırmaq, daha sonra müalicəsini aparmaq lazımdır. Çəhrayı dəmrov xəstəliyi isə yaz-payız aylarında daha çox rast gəlinir. Havanın dəyişməsi, infeksion-allergik mühitin yaranması nəticəsində əmələ gəlir, dəri səthində müxtəlif ölçülü çəhrayı ləkələr yaranır. Xəstələr daha çox qaşınmadan şikayət edirlər. Düzgün müalicə aparıldıqda sağalan xəstəlikdir”.
O, uşaqların dərisində yaranan bütün xəstəliklər zamanı mütləq şəkildə ərazi üzrə poliklinikalara müraciət etməyin vacibliyini də vurğulayıb: “Ləkədir, yaranıb, keçər, gedər - deməyin. Həkimə müraciət edin! Biz dispanser şəraitində istənilən dəri xəstəliklərinin müayinə və müalicəsini həyata keçiririk. Uşaqlar bizim gələcəyimizdir. Sağlam gələcək naminə onların sağlamlığına biganə yanaşmayaq”.
Bölmənin digər xəbərləri
