ÜZGÜÇÜLÜK KOMPLEKSİNDƏ SON TAMAMLAMA İŞLƏRİ
Naxçivanda aparılan quruculuq işləri davam etdirilir. Cənab İlham Əliyevin Prezidentlik fəaliyyətinin 100 günü ilə əlaqədar muxtar respublika Ali Məclisinin təsdiq etdiyi tədbirlər planına əsasən, yaxın günlərdə onlarca sosial obyektin açılış mərasimi olacaqdır. Belə obyektlərdən biri də Naxçıvan şəhərində inşa edilən üzgüçülük kompleksidir. Obyektin tikintisini Bakı şəhərində yerləşən “Aykon” şirkəti aparır. Müasir arxitektura və şərq memarlıq ənənələrinə uyğun hazırlanmış layihə üzrə tikilən həmin bina ölkəmizdə ilk üzgüçülük kompleksidir. Burada hər şey beynəlxalq normalara cavab verir. Binanın işıq, hava, istilik sistemində, daxili bəzək işlərində istifadə olunan materialların hamısı Avropa ölkələrindən alınmışdır.
“Aykon” şirkətinin mühəndisi Azər Hümbətovun dediyinə görə, bu obyektin tikintisi yaxın günlərdə başa çatdırılacaqdır. Yeni kompleksdə gələcəkdə üzgüçülük üzrə beynəlxalq yarışlar da keçiriləcəkdir.
Bölmənin digər xəbərləri
