ÜZGÜÇÜLÜK ÜZRƏ BAKI ŞƏHƏR ÇEMPİONATI BAŞA ÇATMIŞDIR

31.03.2006 [17:50]
Çap et
A⁺ A^-

AZƏRTAC xəbər verir ki, “Təhsil” Respublika İdman Mərkəzinin hovuzunda üzgüçülüyün sprint növü üzrə keçirilən Bakı şəhər çempionatına yekun vurulmuşdur.

Paytaxtın 10 idman klubu və cəmiyyətindən 60-a yaxın üzgüçünün qatıldığı yarışları baş hakim Vaqif Nəsibovun rəhbərliyi ilə hakimlər briqadası idarə etmişdir. Turnirdə batterflay üsulu ilə Leyla İslamova (“Təhsil” RİM), Teymur Quliyev (ADBTİA), arxası üstə üsulu ilə Yelena Paşutina (“Neftçi” İSM), Tural Abbasov (“Təhsil” RİM), brass üsulu ilə Könül Cəfərova (ADBTİA), Ruslan Bolşakov (“Təhsil” RİM), sərbəst üsulla Natalya Filina (“Təhsil” RİM), Orxan Səmədov (MOİK), kompleks üsulla Səbinə Hüseynova (“Təhsil” RİM) və Elgün Babayev (“Təhsil” RİM) birinci yer tutmuşlar.

Qaliblərə Bakı şəhər Gənclər və İdman Baş İdarəsinin diplomu və qiymətli hədiyyələri təqdim olunmuşdur.