VERGİLƏR NAZİRLİYİ MƏTBUAT XİDMƏTİNİN MƏLUMATI
Vergilər Nazirliyinin Operativ Nəzarət İdarəsi və Dövlət Gömrük Komitəsinin qaçaqmalçılıq və gömrük qaydalarının pozulması ilə mübarizə Baş idarəsi əməkdaşlarının martın 28-də Qazax şəhərində apardıqları birgə reyd nəticəsində şəhərin Azadlıq 46 ünvanında yerləşən, “Carçıoğlu” və “Piroğlu” firmalarına məxsus anbarlarda respublikaya qaçaqmalçılıq yolu ilə idxal olunmuş külli miqdarda ərzaq məhsulları aşkar edilmişdir. Müvafiq əraziyə keçirilən baxış zamanı anbarlarda üzərində aksiz markası olmayan İtaliya və Türkiyə istehsalı olan pivə məhsulları, Yeni Zenlandiya və Rusiya istehsalı olan yağ məhsulları, vaxtı keçmiş və aksizsiz xarici araq məhsulları qeydə alınmışdır.
Elə həmin ünvanda vergi və gömrük orqanları əməkdaşları qeyri-qanuni şəkildə fəaliyyət göstərən şampun istehsalı sexi və həmin sexdə şampun istehsal etmək üçün 200-dən çox yüz litrlik boçkalarda saxlanılan, şampun istehsalı üçün respublikaya sənədsiz gətirilmiş komponentlər aşkar etmişlər. Müəssisənin rəhbərliyi və baş mühasibi hadisə yerindən qaçmış və bu günə qədər də yoxlama orqanlarından gizlənirlər. Məlumat üçün bildirək ki, ilkin təhqiqatlardan sonra həmin məhsulların bir hissəsinin də firmanın Bakı şəhəri Xətai rayonu ərazisində Rəfiyev, 19 ünvanında yerləşən anbarlarında da saxlanıldığı bəlli olmuşdur. Bakı şəhərində aparılan yoxlamalar zamanı burada da külli miqdarda sənədsiz məhsullar və saxta aksiz markaları aşkar edilmişdir. Hazırda Qazax şəhərində Vergilər Nazirliyinin Vergi cinayətlərinin ibtidai araşdırılması Departamentinin və 6 saylı ərazi vergilər idarəsinin auditorları araşdırma aparırlar.
Bölmənin digər xəbərləri
