Bakı, 2 noyabr, AZƏRTAC

Noyabrın 1-də “Veysəloğlu” Şirkətlər Qrupuna daxil olan “AVT Logistics” MMC-nin qapalı anbar ərazisinə və “Araz” supermarketlər şəbəkəsinə daxil olan “Xonça” fabrikinə mediatur keçirilib.

AZƏRTAC xəbər verir ki, mediatur zamanı müxtəlif media qurumlarını təmsil edən jurnalistlər “AVT Logistics” MMC-nin qapalı anbar ərazisində və “Xonça” fabrikindəki iş prosesi ilə yaxından tanış olublar.

Mediatur zamanı jurnalistləri anbarın və fabrikin işi ilə “AVT Logistics” MMC - İdarə Heyətinin sədri Co Daybel, İdarə Heyətinin üzvü Pərviz Qasımov, “Xonça” fabrikinin rəhbəri Nüsrət Məlikov, İstehsalat departamentinin müdiri Rəhman Ələkbərov və “Araz” supermarketlər şəbəkəsinin kateqoriya müdiri Vüsal Məmmədov tanış edib.

“AVT Logistics” şirkətinin İdarə Heyətinin sədri Co Daybel qeyd edib ki, “AVT Logistics” 2015-ci ildə qrupa daxil olan digər şirkətlərin istehsal və idxal etdiyi malların logistikasının həyata keçirilməsi məqsədilə yaradılıb: “48 min kvadratmetrlik qapalı anbar sahəsinə və 87 min palet tutumuna malik “AVT Logistics” MMC Qafqazın ən böyük anbarı olmaqla yanaşı, ölkənin gündəlik istehlak mallarına olan tələbatının böyük bir qismini təmin edir. Şirkət sahib olduğu 500-dən çox nəqliyyat vasitəsilə aylıq 2 milyon kilometrdən çox məsafə qət etməklə, 15 mindən çox satış nöqtəsinə sifarişlərin vaxtında çatdırılmasını həyata keçirir. -18°C-dən +23°C-yə qədər rejimdə təzə, dondurulmuş, soyudulmuş qida məhsulları və digər növ qida və qeyri-qida məhsullarının saxlanması, sifariş üçün hazırlanması, paketlənməsi, etiketlənməsi, paylanma və qaytarma əməliyyatları şirkətdə çalışan 2 min 200 nəfərdən çox əməkdaş tərəfindən reallaşdırılır”.

Co Daybelin dediyinə görə, “AVT Logistics” MMC yerli məhsullarla yanaşı, bir sıra ölkələrdən də mal idxalı, həmin malların saxlanılması və çatdırılması prosesini də həyata keçirir. Bu, şirkətə bazara uyğun əlverişli qiymət strategiyasını həyata keçirməyə imkan verir. Şirkət 2021-ci ildən etibarən əlavə 300 mağazaya xidmət göstərməklə müştərilərin keyfiyyətli məhsul ilə bağlı seçim imkanını artırıb. Bu il 10 min 432 kvadratmetr sahəyə malik yeni logistika mərkəzinin inşasına başlanılıb. Təzə və dondurulmuş məhsulların, meyvə-tərəvəz məhsullarının keyfiyyətlə saxlanılmasına imkan verəcək yeni mərkəzin 2022-ci ildə istifadəyə verilməsi nəzərdə tutulur”.

Keyfiyyətli xidmətlə yanaşı, əməkdaşlarının inkişafının şirkətin prioritetlərindən biri olduğunu vurğulayan İdarə Heyətinin üzvü Pərviz Qasımov bildirib: “Şirkətdə uzun müddətli karyera üçün şərait yaradılır, mütəxəssis olaraq işə başlayan əməkdaşlar lider olaraq yetişir və yüksək vəzifələrə təyin olunurlar. Anbar əməkdaşlarının ixtisasının artırılması məqsədilə bu ilin əvvəlindən “Fəhlədən mütəxəssisə” və “Mütəxəssisdən rəhbərə” proqramlarına start verilib. Proqram çərçivəsində fəhlə kateqoriyasına daxil olan əməkdaşlara potensiallarına və maraq dairələrinə uyğun peşələrə yiyələnmələri üçün təlimlər keçirilib. Həmçinin “AVT Logistics” MMC ixtisaslı peşə yönümünün inkişafına töhfə vermək məqsədilə müvafiq peşə məktəbləri ilə tərəfdaşlıq edir, məzunların şirkətdə istehsalat təcrübəsi keçməsinə və gələcəkdə işlə təmin olunması üçün şərait yaradır”.

Mediaturda jurnalistləri “Xonça” fabrikindəki iş prosesi ilə İstehsalat departamentinin müdiri Rəhman Ələkbərov tanış edib. Fabrikin fəaliyyət istiqamətləri üzrə məlumat verən R.Ələkbərov bildirib: “Hazırda fabrik 3 əsas istiqamət - şirniyyat və un məmulatlarının istehsalı, ət istehsalı və keytrinq xidmətləri üzrə fəaliyyət göstərir. “Xonça”nın şirniyyat və un məmulatları üzrə fəaliyyəti müasir və yüksək texnologiyalı avadanlıqlarla, həmçinin İsveçrənin “Rondo” markasına məxsus istehsal xətti, Almaniya istehsalı olan MIWE sobaları ilə təmin edilir. Hazırda “Xonça” şirniyyat fabrikində 200 çeşiddən çox un məmulatı istehsal olunur. Müəssisənin ümumi illik istehsal həcmi 8 min tondur. Fabrikdə Fransa, Almaniya, Avstriya, Rusiya və Ukraynada xüsusi təlim keçmiş texnoloqlar və işçi heyəti çalışır”.

“Xonça” fabrikinin digər önəmli fəaliyyət istiqaməti isə yalnız yerli cins heyvanların ətindən istifadə edilərək həyata keçirilən ət emalıdır. Heyvanların qəbulu zamanı müəyyən göstəricilər üzrə seçim həyata keçirilir. Baxış zamanı dana əti cəmdəyinin maksimal xalis çəkisinin 210 kiloqram, qoyun əti cəmdəyinin isə 18 kiloqrama qədər olmasına fikir verilir. Təzə ət emal olunaraq “Araz” və “Spar” supermarketlər şəbəkəsində əhaliyə təqdim olunur.

R.Ələkbərov, həmçinin qeyd edib ki, fabrikin yeni istiqamətlərindən biri olan keytrinq keyfiyyətli xidmət missiyasına xidmət edir: “Hazırda Məhəmmədi, Keşlə, Balaxanı ərazisi, Salyan rayonu və Mingəçevir şəhərində yerləşən 5 mətbəxdə ən yeni avadanlıqlarla istehsal prosesi aparılır. “Xonça” hazırda 10 şirkətə korporativ keytrinq xidməti göstərir. Burada həm yerində istehsal və xidmət, həm də termoboks və birnəfərlik qablarda çatdırılma həyata keçirilir. Qeyd edək ki, sadəcə Məhəmmədi ərazisindəki mətbəx gündəlik 10 min porsiya yemək hazırlamaq potensialına malikdir. İstər inqrediyentlər, onların saxlanma və istifadə şərtləri, istərsə də yeməyin hazırlanması daxili Keyfiyyətə Nəzarət departamenti tərəfindən daimi yoxlanılır və hər gün Azərbaycan Qida Təhlükəsizliyi Agentliyinə nümunələr təqdim edilir. Şirkət tərtib etdiyi gündəlik menyu baxımından bazarda ən uyğun və ən keyfiyyətli ketrinq xidməti təklif edir”.

Mediatur çərçivəsində “Xonça” fabriki barədə bildirilib ki, fabrik 2022-ci ildə istehsal və satış dövriyyəsinin 60 faiz artırmağı nəzərdə tutur. Həmçinin qeyd edilib ki, “Xonça”dan süfrələrə ləzzət gətirən un məmulatlarını “Araz” və “Spar” supermarketlər şəbəkəsini əhatə edən 111 satış nöqtəsindən əldə etmək mümkündür. “Xonça” fabriki ilə Bakı Peşə Liseyi arasında mövcud olan əməkdaşlıq çərçivəsində liseyin şagirdləri “Xonça” istehsalat sahəsində təcrübə keçə, həm də məzun olduqdan sonra burada işlə təmin oluna bilərlər. Ləzzəti və xüsusi tərkibi ilə fərqlənən məhsulların hazırlanmasında keyfiyyətli xammal və inqrediyentlərdən istifadə “Xonça”nı fərqli edən əsas nüansdır”.

Sonda mediatur iştirakçılarının “Veysəloğlu” Şirkətlər Qrupuna daxil olan “AVT Logistics” MMC-nin qapalı anbar ərazisinə və “Araz” supermarketlər şəbəkəsinə daxil olan “Xonça” fabrikinin iş prosesi barədə təəssüratları öyrənilib.