VORONEJDƏKİ SOYDAŞLARIMIZ II QURULTAYDAN SONRA DAHA FƏAL OLACAQLAR
Bu sözləri AZƏRTAC-ın müxbiri ilə müsahibəsində Voronejdə (Rusiya) fəaliyyət göstərən “Yedineniye-Birlik” təşkilatının sədri İlham Kazımov demişdir. İ.Kazımovun sözlərinə görə, dünyanın 140 ölkəsindən yüzlərlə insanı bir araya toplamaq, onların problemləri ilə maraqlanmaq və həllinə kömək göstərmək çox böyük işdir. Bu, həm də, Azərbaycandan uzaqda yaşayan soydaşlarımızın daha sıx birləşmələri və doğma Vətənləri naminə çalışmaları üçün yaradılmış ən gözəl imkandır. Qurultaydan sonra rayonlarda olduq. Doğma Azərbaycanımıza bu səfərimiz zamanı keçiridiyimiz görüşlər, aldığımız ruh yüksəkliyi və enerji, yaşadığımız ölkələrdə diaspor və lobbiçilik fəaliyyətimizi daha da inkişaf etdirmək üçün yeni imkanlar açmışdır. İnamla deyə bilərik ki, diasporumuz bundan sonra daha da güclənəcəkdir. Güclü diaspor isə güclü Azərbaycan deməkdir. Bu qurultayda hər şeyə, o cümlədən ən ağrılı problemimizə də toxunuldu. Qurultayda Dağlıq Qarabağ münaqişəsi ilə əlaqədar müraciət qəbul olundu. Bizim də borcumuz torpaqlarımızın işğaldan azad olunması istiqamətində fəaliyyətimizi gücləndirmək, yaşadığımız yerlərdə hakimiyyət strukturları ilə ciddi iş aparmaqdır. Prezidentimizin də dediyi kimi, əgər sülh danışıqları nəticə verməsə, biz torpaqlarımızı başqa yollarla azad etməliyik. Biz buna hazır olmalıyıq, bunun üçün dəstək qazanmalıyıq.
Təşkilatımızın Voronejin vilayət və şəhər rəhbərliyi, siyasi partiyaları ilə sıx əlaqələri vardır. Bir çoxumuz, həm də, bir sıra qurumlarda təmsil edilirik. Çalışırıq ki, onların hamısı Azərbaycanın, azərbaycanlıların dostları olsunlar. Məlumat üçün bildirim ki, bu gün Voronejdə 50 minə yaxın azərbaycanlı yaşayır. “Yedineniye-Birlik” təşkilatı onların daha sıx birləşmələri, üzləşdikləri problemlərin tez bir zamanda həlli üçün əlindən gələni edir. Soydaşlarımızın doğma Vətənimizi, tariximizi, dilimizi, mədəniyyətmizi unutmamaları üçün tədbirlər görülür. Milli bayramlarımız, əlamətdar günlərimiz təntənə ilə qeyd olunur. Azərbaycanın tanınmış mədəniyyət ustaları da bu tədbirlərə dəvət olunurlar. Şənliklərimizdə başqa millətlərin də nümayəndələri iştirak edirlər. Onlar azərbaycanlıların sülhsevər və qonaqpərvərliyinin əyani şahidi olurlar. Azərbaycanlıların daha sıx yaşadıqları şəhər, rayon və qəsəbələrdə “Bazar günü” məktəbləri açılmışdır. Bu məktəblərdə Azərbaycanımızın tarixi, mədəniyyəti öyrədilir, milli adət-ənənələrimiz və milli mətbəximiz barədə bilik verilir. Hesab edirik ki, uşaqlarımız doğma Vətənimzlə bağlı nə qədər çox məlumat toplasalar, bir o qədər çox vətənpərvər olacaqlar. Məktəblərimizə rus və digər millətlərin uşaqları da maraq göstərirlər, milli rəqslərimizi, mətbəximizi öyrənirlər.
Rusiya-Azərbaycan münasibətlərinin inkişafına da xüsusi diqqət yetirilir. Tələbə mübadiləsi və hər iki ölkənin gənclərinin Azərbaycanda və Rusiyada təhsil almaları üçün danışıqlar aparılır. Biz voronejli iş adamlarının Azərbaycana gəlmələrinə və ölkə iqtisadiyyatına sərmayə qoymalarına da çalışırıq. Artıq bir neçə qarşılıqlı səfərlər olmuşdur. Voronejin bir sıra iş adamları Azərbaycanda istehsal olunan bəzi sənaye məhsullarını almaq niyyətindədirlər. Voronejdə istehsal olunan məhsullara da Azərbaycanda tələbat vardır. Bunun üçün Bakıda və Voronejdə sərgilərin təşkili nəzərdə tutulmuşdur. Martın 28-29-da Voronejin bir qrup iş adamı Bakıya gələcəkdir. Bu səfər zamanı iqtisadi-ticarət əlaqələrinin inkişafına dair razılaşma əldə ediləcəkdir.
Bir sözlə, çalışacağıq ki, Azərbaycanı Voronejdə layiqincə təmsil edək, ağrılı problemlərimizin həllində yaxından iştirak edək, Prezidentimizin ətrafında daha sıx birləşək, daha mütəşəkkil olaq.
Bölmənin digər xəbərləri
