Vüqar Əliyev: Türkdilli ölkələrin feyk xəbərlərlə mübarizəsi qarşımızda duran əsas vəzifələrdəndir
İstanbul, 6 noyabr, AZƏRTAC
Türk Xəbər Agentlikləri Alyansının (ATNA) yaradılması layihəsi üzərində iki ilə yaxındır iş aparılırdı. Bu birlik əvvəl də var idi. Sadəcə, bəzi dəyişikliklər edildi və Anadolu Agentliyinin təklifi ilə birliyin adı dəyişdirildi.
Bu fikirləri Azərbaycan Dövlət İnformasiya Agentliyinin (AZƏRTAC) İdarə Heyətinin sədri Vüqar Əliyev İstanbulda mediaya açıqlamasında bildirib.
AZƏRTAC ilə Anadolu Agentliyinin Alyansın Nizamnaməsinin hazırlanmasında birgə çalışdıqlarını qeyd edən Vüqar Əliyev deyib: “Layihə iki ildən sonra öz bəhrəsini verdi, ATNA-nın Bəyannaməsini bu gün imzaladıq. Qarşıda duran vəzifələr var. Türkdilli ölkələrin feyk xəbərlərlə mübarizəsi qarşımızda duran əsas vəzifələrdəndir. Bunun üçün də xəbər agentliklərimizin sıx əməkdaşlığı olduqca vacibdir.
Demək olar ki, bütün xəbər agentliklərinin məhz feyk xəbərlərlə bağlı problemlərlə qarşılaşdıqlarını qeyd edən AZƏRTAC-ın İdarə Heyətinin sədri Azərbaycanın da feyk xəbərlərdən əziyyət çəkən ölkələrdən olduğunu diqqətə çatdırıb: “Bizim mənfur düşmənlərimiz Qarabağ müharibəsində ancaq feyk xəbərlər yaymaqla məşğul idilər. Biz bununla mübarizə apardıq. Ümid edirik ki, yeni qurulan Türk Xəbər Agentlikləri Alyansı xalqlarımızın bir-birini daha yaxından tanıması və doğru xəbərlərin qarşılıqlı çatdırılması işinə kömək edəcək”.
Bölmənin digər xəbərləri
