Vyana, 8 noyabr, AZƏRTAC

Vyana şəhərində Avstriyadakı Azərbaycanlı Tələbələr və Məzunlar Platforması (ASAP Austria) tərəfindən “Qarabağ – Böyük Qayıdış” adlı tədbir təşkil olunub.

AZƏRTAC xəbər verir ki, tədbirin məqsədi yerli və xarici tələbələri son dörd ildə Qarabağda aparılan yenidənqurma və bərpa işləri ilə tanış etməkdən ibarət olub.

Tədbirin ilk hissəsində ASAP Avstriyanın sədri Ənvər Əliyev təqdimatla çıxış edərək Qarabağda aparılan əsas yenidənqurma istiqamətləri, infrastrukturun bərpası və yaşayış şəraitinin yaxşılaşdırılması barədə ümumi məlumat verib. Təqdimatda, həmçinin yerli və xarici investisiyaların rolu, dövlət və özəl sektorun layihələri, uğurlu investisiya nümunələri təqdim edilib. Diqqətə çatdırılıb ki, bu layihələr arasında hava limanları, məktəblər, Qarabağ Universiteti, mədəniyyət abidələri, məscidlər, su təchizatı və enerji sistemlərinin bərpası yer alır. Həmçinin, yeni yaşayış ərazilərinin qurulması, xüsusilə Zəngilan rayonundakı Ağalı kəndi və Füzuli rayonundakı Dövlətyarlı kəndində həyata keçirilən “Ağıllı kənd” layihələri barədə ətraflı məlumat paylaşılıb. Bu kəndlərdə yalnız yaşıl enerjidən istifadə olunmaqla ölkəmizin regionda ətraf mühitin qorunmasında oynadığı önəmli rol bir daha vurğulanıb. Bu kontekstdə, bu ay Azərbaycanda keçiriləcək COP29 tədbirinin əhəmiyyəti də qeyd olunub. Tədbirdə xarici tələbələrin iştirakının çoxluq təşkil edəcəyi nəzərə alınaraq, xüsusi diqqət xarici investisiyalara ayrılıb. Ona görə də təqdimat çərçivəsində Avstriya, İtaliya, Slovakiya, Macarıstan, Türkiyə, Özbəkistan, Qazaxıstan və digər ölkələrin Qarabağda gördükləri işlər barədə foto və videomateriallar hazırlanıb.

Daha sonra tədbir iştirakçılarına keçmiş məcburi köçkünlərin öz doğma torpaqlarına qayıdışı ilə bağlı statistik məlumatlar, süni intellekt tərəfindən hazırlanmış Qarabağ regionunun gələcək inkişafı ilə bağlı təsvirlər nümayiş etdirilib. Təqdimatın sonunda aparılan quruculuq işləri ilə bağlı videoçarx nümayiş olunub və Zəfər Gününə həsr olunmuş viktorina keçirilib. Qaliblərə xatirə hədiyyələri təqdim edilib.

Qeyd edək ki, tədbir Azərbaycan Respublikasının Qaçqınların və Məcburi Köçkünlərin İşləri üzrə Dövlət Komitəsi, Gənclər Fondu və Vyanadakı Azərbaycan Mədəniyyət Mərkəzinin dəstəyi ilə həyata keçirilib.

Elgün Niftəli

AZƏRTAC-ın xüsusi müxbiri

Vyana