SİYASƏT
Vyetnam xalqı görkəmli dövlət xadimi Heydər Əliyevin köməyini heç vaxt unutmayacaq
![](/files/galleryphoto/2020/2/1200x630/15888669383158623536_1200x630.jpg)
![](/files/galleryphoto/2020/2/1200x630/15888669386214261952_1200x630.jpg)
![](/files/galleryphoto/2020/2/1200x630/15888669381144328034_1200x630.jpg)
![](/files/galleryphoto/2020/2/1200x630/1588866938465984454_1200x630.jpg)
![](/files/galleryphoto/2020/2/1200x630/158886693818635211_1200x630.jpg)
Pekin, 7 may, AZƏRTAC
Azərbaycanın Vyetnamdakı səfirliyində ümummilli lider Heydər Əliyevin anadan olmasının 97-ci ildönümü münasibətilə tədbir keçirilib.
Səfirlikdən AZƏRTAC-a bildirilib ki, tədbirdə Vyetnam-Azərbaycan Dostluq Assosiasiyasının, Azərbaycanın Mədəniyyəti və Tarixi Araşdırmaları Mərkəzinin rəhbərliyi, habelə Azərbaycan təhsil ocaqlarının vyetnamlı məzunları iştirak ediblər.
Səfir Anar İmanov Azərbaycan xalqının ümummilli lideri Heydər Əliyevin həyatı və siyasi fəaliyyəti haqqında dolğun məlumat verərək dünya şöhrətli siyasətçinin iki fərqli dövrdə - Sovet İttifaqının tərkibində olduğu və daha sonra müstəqillik zamanı Azərbaycana uğurla rəhbərlik etdiyini diqqətə çatdırıb. Ulu öndər Heydər Əliyev çox qısa bir müddət ərzində kənd təsərrüfatı və neft hasil edən Azərbaycanı keçmiş Sovet İttifaqının sənaye cəhətdən ən inkişaf etmiş respublikalarından birinə çevirməyə nail olub.
Görkəmli dövlət xadimi Heydər Əliyevin müstəqil Azərbaycana rəhbərlik etdiyi dövrə diqqət yetirən A.İmanov xalqımızın ümummilli liderinin cəsarətli qərarları ilə ölkəmizi unitar, qanuni, demokratik və dünyəvi bir dövlət kimi mövcudluğunu daha da möhkəmləndirməyə müvəffəq olduğunu bildirib. Ulu öndər Heydər Əliyev müdrik siyasəti, sarsılmaz inancları və tarixi uzaqgörənliyi sayəsində milli dövlətçilik ideyasını həyata keçirməyə, müasir Azərbaycan dövləti qurmağa və xalqımızın müstəqillik arzularını gerçəkləşdirməyə müvəffəq olub.
Səfir ümummilli lider Heydər Əliyevin hakimiyyəti dövründə ölkəmizin dünyanın fəal və dinamik inkişaf edən dövlətlərindən birinə, habelə beynəlxalq birliyə tamhüquqlu üzv kimi inteqrasiya olunaraq beynəlxalq aləmdə tanınan, mövqeləri möhkəm olan və etibarlı tərəfdaşa çevrildiyini bildirib.
A.İmanov Ulu Öndərin Azərbaycanla Vyetnam arasında əlaqələrin qurulmasında və inkişafında əvəzolunmaz roluna toxunaraq məhz ümummilli liderimizin 1983-cü ildə Vyetnama səfərinin iki ölkə arasındakı zəngin tarixi keçmişə və səmimi dostluğa əsaslanan əlaqələrin təməlini möhkəmləndirdiyini qeyd edib. Qeyd olunub ki, Heydər Əliyev siyasəti onun layiqli davamçısı Prezident İlham Əliyev tərəfindən uğurla davam etdirilir.
Vyetnam-Azərbaycan Dostluq Assosiasiyası sədrinin müavini səfir Truonq Manh Tien Heydər Əliyevin adının Vyetnam xalqının zehnində əbədi həkk olunduğunu bildirərək dünya səviyyəli ictimai-siyasi xadimin etdiyi köməyin Vyetnam xalqının yaddaşından heç zaman silinməyəcəyini xüsusi vurğulayıb. O, Azərbaycan ilə Vyetnam arasındakı əlaqələrin bugünkü yüksək səviyyəsinin məhz Heydər Əliyevin Azərbaycana rəhbərlik etdiyi hər iki dövrdə Vyetnama münasibətdə həyata keçirdiyi siyasət sayəsində təmin edildiyini deyib.
Truonq Manh Tien Azərbaycanın təhsil ocaqlarını bitirən minlərlə vyetnamlının ölkəsinin müharibədən sonra keçdiyi son dərəcə mürəkkəb bərpa dövründə və hazırkı sürətli inkişafında fəal çalışdıqlarını məmnunluqla söyləyib. O, Vyetnamla münasibətlərə böyük diqqət yetirdiyinə görə Azərbaycan hakimiyyətinə təşəkkürünü bildirib, Prezident İlham Əliyevin rəhbərliyi ilə Azərbaycanın daha da böyük uğurlar əldə edəcəyinə əminliyini ifadə edib.
Tədbir iştirakçıları ümummilli lider Heydər Əliyevin həyatı və siyasi fəaliyyətini, habelə 1983-cü ildə keçmiş Sovet İttifaqı Nazirlər Şurası sədrinin birinci müavini qismində Vyetnama səfərini əks etdirən fotosərgi ilə tanış olub. Səfirlik tərəfindən Vyetnam dilində nəşr etdirilmiş "Heydər Əliyev" adlı kitab tədbir iştirakçılarına təqdim olunub.
Şahin Cəfərov
AZƏRTAC-ın xüsusi müxbiri
Pekin