x x x
- Dəyərli fikirlərinizə görə çox sağ olun. Mənə elə gəlir ki, bu gün bu təqdimat mərasimində haqqında söhbət açılan məsələlərə, qarşımızda dayanan problemlərə, son 3 il ərzində görülən və gələcəkdə görəcəyimiz işlərə bu gəncin çıxışında çox yaxşı bir istiqamət verildi. Təsadüfi deyil, adı “İrəli” olan bu təşkilat Azərbaycanın irəlidə getməsində daim irəlidə olacaqdır. İlham Əliyevi də dəstəkləyən ilk qüvvə Azərbaycan gəncliyidir və məhz ona görə də İlham Əliyev gəncliyə çox böyük diqqət, qayğı göstərir. Elə onun çıxışında söyləndiyi kimi, gəncliyin hərtərəfli inkişafı, onun sosial təminatı, Azərbaycanın ictimai-siyasi həyatında özünəməxsus yer tutması, idarəetmə orqanlarında, seçkili orqanlarda təmsil olunması istiqamətində çox ciddi addımlar atır və bu gün gənclik Azərbaycanda artıq öz sözünü deməkdədir. Əgər gənclik öndədirsə, gənclik öz sözünü demək imkanı qazanıbsa və bu imkandan istifadə etmək qüvvəsinə malikdirsə, deməli, Azərbaycan düzgün yoldadır. Azərbaycan öz inkişafına, qarşısında dayanan ülvi məqsədlərə nail olacaqdır.
Bu gün burada çıxış edənlərin hər biri Azərbaycanın son müstəqillik illərində görülən işlərə qısa tarixi ekskurs etdi. Hər kəs də çalışdı ki, daha original, daha səmimi, daha obyektiv olsun. Amma mən əminəm ki, bizim hər birimiz burada saatlarla danışsaq belə, yenə Heydər Əliyev siyasətinin bugünkü davamı, yaradıcı şəkildə davamı, görülən işlər və müsbət nəticələr haqqında məlumatların yalnız cüzi bir hissəsini əhatə edə bilərik. Çünki bu, bütövlükdə ölkə həyatını əhatə edir, hər bir Azərbaycan vətəndaşının, hər bir fərdin həyatını əhatə edir. O mənada bunun həcmi, miqyası çox genişdir, tutumu çox böyükdür və bu gün hər birimiz yalnız bu məsələyə toxunmaq imkanı əldə etmişik.
Mən bütün bu deyilənləri ümumiləşdirərək, qənaətimi bir də sizinlə bölüşmək istəyirəm: xoşbəxt o xalq deyil ki, onun qarşısına problemlər çıxmır. Yaxud da xoşbəxt o xalq deyil ki, onun ölkəsinin yaxşı geosiyasi mövqeyi, milli sərvətləri, enerji resursları var. Xoşbəxt o xalqdır ki, onun qarşısına çıxan problemləri dəf etməyə, aradan qaldırmağa, millətin, xalqın, dövlətin potensialını bir araya gətirməyə qabiliyyəti çatan, cəsarəti və qətiyyəti çatan lideri var. Xoşbəxt o xalqdır ki, onun malik olduğu maddi, milli və mənəvi resursları səfərbər etməyə, təmsil etdiyi ölkənin və millətin inkişafına yönəltməyə bacaran bir lideri var. Hər bir vətəndaşının daim güvəndiyi, arxalandığı, qəlbən sevdiyi, inandığı, etimad göstərdiyi Prezidenti var. Azərbaycan xalqı xoşbəxtdir. Çünki sadaladığımın hamısı bizdə var.
Baxmayaraq ki, xoşbəxt xalqlar sırasında bizim də bəxtimizə bəzi ağrı-acılar, faciələr, problemlər düşübdür. Amma çox yaxşı ki, biz bunları dəf etməyi, ayaqda durmağı bacara bilmişik və bu gün Azərbaycan dövləti ayaq üstədir. Yalnız öz imkanlarına, öz resurslarına arxayındır və onlardan səmərəli şəkildə istifadə edir, sabaha inamla baxır, seçdiyi Prezidentə güvənir, arxalanır, ona dayaq durur. Azərbaycan Prezidenti də xoşbəxtdir ki, onun belə bir xalqı var və xalqla onun istək və arzuları eynidir. Bunlara yetmək üçün müəyyənləşdirdikləri yol eynidir, bu yol Heydər Əliyev yoludur, bu yol bizim sabahımızın, inkişafımızın, gələcəyimizin təminatçısıdır. Məhz bu yolun mövcudluğu, Heydər Əliyev ideyalarının, arzularının mövcudluğu və bizim hər birimizin bu ideyalarla silahlanmağımız və öndə də bu ideyaların ən layiqli gerçəkləşdiricisi olan İlham Əliyevin olması bizi Rafael Hüseynovun söylədiyi istiqamətdə aparacaqdır. Bu gün məhz görülən bu işlər, konkret müsbət nəticələr, Azərbaycanın inkişafı, ölkənin paytaxtı ilə regionları arasındakı fərqin aradan qaldırılmasına hər bir sadə kənd əməkçisinin müasir tələblərə, müasir standartlara uyğun gələn kommunal xidmətlə təmin olunmuş şəkildə yaşamasına göstərilən səylər, cəhdlər Azərbaycanın enerji resurslarının istifadəsindən gələn gəlirlərin digər sahələrin inkişafına yönəldilməsi və yalnız Azərbaycanın milli və dövləti maraqlarına uyğun şəkildə istifadəsi bizi həmin məqsədə çatdıracaqdır. Bu, elə Qarabağa gedən yolun salınmasıdır. Burada Xınalıq da var, burada Daşkəsən-Şəmkir yolu da, Qazax yolu da var, Bakının yolları da var. Mən çox istərdim ki, bu yolların hər biri möhkəm əsaslar üzərində qurulsun. Məhz Heydər Əliyevin müəyyənləşdirdiyi yol qədər yaşar və əbədi olsun və Azərbaycanı sabahlara, qarşımızda dayanan ülvi məqsədlərə çatdırsın.
Mən fikrimi yekunlaşdıraraq, bu kitabı araya-ərsəyə gətirən insanları, Azərbaycanın say-seçmə ziyalılarını, başda Ramiz müəllim Mehdiyev, müasir Azərbaycanın tarixinin tədqiqini, qələmə alınmasını təşkil edən bu böyük şəxsiyyət olmaqla, Əli müəllim Həsənova, Novruz Məmmədova, Ziyafət Əsgərova, Mübariz Qurbanlıya, Ziyad müəllim Səmədzadəyə, əmək və əhalinin sosial müdafiəsi naziri Füzuli müəllimə, Rəbiyyət xanım Aslanovaya, Azər Əmiraslanova və Səlahəddin Xəlilova öz dərin təşəkkürümü bildirirəm. Onlar hər birimizin qəlbindən, ürəyindən keçən fikirləri bir araya gətirə, qələmə ala biliblər və bunları Azərbaycan Respublikasının Prezidenti cənab İlham Əliyevin Prezidentliyinin 3 illiyinə həsr olunmuş bu tədbirdə təqdim etmək imkanını bizə yaşadıblar. Eyni zamanda, mən bizim Yeni Azərbaycan Partiyasının gəncliyinin ən öndə gedən nümayəndələrindən biri olan Elnur Aslanov başda olmaqla, kitabın tərtibçilərinə öz təşəkkürümü bildirirəm. Bu kitabın araya-ərsəyə gəlməsində əməyi olan hər bir kəsə öz təşəkkürümü bildirirəm. Hesab edirəm ki, bu kitab əliyevşünaslığa, azərbaycanşünaslığa, Azərbaycan tarixinə, Azərbaycanın siyasət tarixinə çox böyük bir töhfədir. Tədbirdə iştirakınıza görə, çox sağ olun, diqqətinizə görə təşəkkür edirəm.
Bölmənin digər xəbərləri
