- Hörmətli xanımlar və cənablar!

Dəyərli mərasim iştirakçıları!

Bugünkü tədbirin mahiyyətini Azərbaycanın ən müasir tarixinin son 3 ilinin təntənəsi kimi də qiymətləndirmək olar. Əslində, bir tarixi dövrün qiymətləndirilməsi üçün, bəlkə də, 3 il çox qısa bir zaman kəsiyidir. Lakin əminliklə deməliyəm ki, cənab İlham Əliyevin Azərbaycan Respublikasının Prezidenti seçilməsindən bu günə qədər ölkədə elə bir dinamik inkişaf getmişdir ki, Azərbaycan nəinki regionu, hətta bütün dünyanı müsbət mənada heyrətləndirmişdir. Əgər başqa ölkələrdə tarixi inkişaf mərhələləri bir-birini uzun illər ərzində əvəzləmişdirsə, cənab Prezidentin çevik və səmərəli islahatları nəticəsində Azərbaycan bu mərhələləri çox az bir zamanda keçir. Məncə, Azərbaycan tədqiqatçıları, alimləri, tarixçiləri ən müasir tariximizin hər bir mərhələsini diqqətlə öyrənməli, tədqiq etməli və gələcək nəsillərə çatdırmalıdırlar.

Bu gün təqdimat mərasiminə toplaşdığımız “İlham Əliyev: İqtibaslar və təhlil” kitabı da məhz belə bir tədqiqatın nəticəsində meydana gəlmişdir. Belə ki, kitab hazırlanarkən cənab Prezidentin son 3 il ərzindəki, ümumi həcmi 2 min səhifəyə yaxın olan 218 nitqi və çıxışı diqqətlə təhlil edilmiş və bunlardan seçilmiş iqtibaslar müxtəlif istiqamətlər üzrə qruplaşdırılmışdır. Ayrı-ayrı mövzular üzrə müəlliflərin məqalələri kitabı daha da zənginləşdirmişdir.

Görünən reallıq budur ki, cənab Prezidentin fəaliyyəti dövründə Azərbaycan dövlətini və Azərbaycan vətəndaşlarının mənafeyini ifadə edən heç bir məsələ diqqətdən kənarda qalmamışdır. “Mən hər bir azərbaycanlının Prezidentiyəm” şüarını rəhbər tutan cənab Prezidentin hər bir azərbaycanlıya fərdi olaraq ünvanlanmış qayğısını bu gün hər kəs hiss etməkdədir.

Mən bu gün qarşınızda Azərbaycan gənclərinin nümayəndəsi olaraq dayandığımdan, dövlətimizin sırf Azərbaycan gənclərinə və bütövlükdə gənclər siyasətinə qayğısından bəhs etmək istərdim.

İlk növbədə, onu demək lazımdır ki, gənclər əhalimizin böyük bir hissəsini təşkil etdiyindən, bütün vətəndaşlarımıza şamil olunan dövlət proqramlarından onlar da səmərəli şəkildə bəhrələnməkdədirlər. Xüsusən son 3 il ərzində 500 minə yaxın yeni iş yerinin açılması gənclər arasında işsizliyin azaldılması sahəsində ciddi töhfə olmuşdur. Yoxsulluğun azaldılması, regionların sosial-iqtisadi inkişafı, insanlarımızın həyat səviyyəsinin yüksəldilməsi gənclərimizin inkişafında müstəsna əhəmiyyət daşımışdır.

Qürur hissi ilə bildirməliyəm ki, cənab Prezidentin Sərəncamı ilə təsdiq olunmuş “Azərbaycan gəncliyi Dövlət proqramı (2005-2009-cu illər)” ilə Azərbaycanda gənclər siyasətinə sanki yeni bir nəfəs gəlmişdir. Bu proqramı dövlətin hər bir Azərbaycan gəncinə ünvanlanmış qayğısı kimi də səciyyələndirmək olar. Belə ki, proqramda bütün kateqoriyadan olan gənclər üçün müddəalar nəzərdə tutulmuşdur: istedadlı gənclər, xüsusi qayğıya ehtiyacı olan gənclər, gənc alimlər, gənc sahibkarlar, gənc ailələr, gənclər təşkilatları və s. Proqram çərçivəsində gənclərin istedadlarının üzə çıxarılması, gənc liderlərin meydana gəlməsi, gənclərin sağlamlığı, asudə vaxtlarının səmərəli təşkili, təşəbbüskar gənclərin formalaşması, gənclərin beynəlxalq əlaqələrinin və əməkdaşlığının inkişaf etdirilməsi məsələlərinə xüsusi əhəmiyyət verilir. Gənclərimizin çoxdan gözlədiyi Azərbaycan gənclər mərkəzlərinin tikilməsi də proqramın müddəaları arasındadır.

Son üç il ərzində gənclərin avanqardını təşkil edən tələbələrin rifah halının yüksəldilməsi də diqqətdən yayınmamışdır. Tələbələrin təqaüdlərinin artırılması, təhsil haqlarının ödənməsində bəzi kateqoriyalardan olan gənclərə güzəştlərin tətbiqi buna misaldır.

Hər bir gəncin arzularından biri də xaricdə təhsil almaq, xarici mədəniyyətlərlə tanış olmaq, dünya görüşünü inkişaf etdirmək, yaxşı mütəxəssis kimi yetişərək Vətənə xidmət etməkdir. Cənab Prezidentin “Azərbaycan gənclərinin xarici ölkələrdə təhsil almasına dair Dövlət Proqramı haqqında” bu günlərdə imzaladığı Sərəncam Azərbaycan gənclərinə böyük bir müjdə olmuşdur və deməliyəm ki, son günlər ərzində gənclər arasında ən çox müzakirə olunan və sevinc doğuran məsələyə çevrilmişdir. Bu proqram Azərbaycanın gələcək inkişafına yönəlmiş strateji bir addımdır. Belə ki, gənclərimizin dünyanın ən nüfuzlu ali məktəblərində təhsil alması Azərbaycanda islahatçılar və peşəkarlar təbəqəsinin artmasına gətirib çıxaracaqdır ki, bu da öz növbəsində, elmin, iqtisadiyyatın, dövlətçiliyin inkişafına böyük bir təkan olacaqdır. Eyni zamanda, bu gənclər təhsil aldıqları ölkələrdə Azərbaycan həqiqətlərinin təbliğinə əvəzsiz töhfə verəcəklər ki, bu da Azərbaycan diasporunun inkişafında müstəsna əhəmiyyət daşıyır.

Dövlətimiz tərəfindən Azərbaycanda insan resurslarına ayrılan daha bir diqqətin təcəssümü kimi, xüsusi istedada malik uşaq və gənclərimizin dövlət tərəfindən himayə olunmasını, onlara təqaüdlərin verilməsini təmin edən dövlət proqramından da söz açılmalıdır. Azərbaycanın uşaq və gənclərinə ölkəmizin gələcəyi kimi yanaşan dövlətimiz heç bir gənci, heç bir uşağı nəzərdən qaçırmadan öz fəaliyyətini əzmlə davam etdirməkdədir.

Gənclərimizin, xüsusən də gənc ailələrin ürəyincə olan daha bir proqram İpoteka Fondunun yaradılmasıdır. Əminik ki, cənab Prezidentin Fondun resurslarından bəhrələnmədə kütləviliyin təmin olunması ilə bağlı verdiyi tövsiyələr nəticəsində gənc ailələr İpoteka kreditlərindən daha geniş şəkildə bəhrələnə biləcəklər.

Əlbəttə ki, gənclərimizin inkişafı ilə bağlı dövlətimizin gördüyü işlər sadaladığım faktlarla məhdudlaşmır. Lakin məsələni xüsusi vurğulamalıyam. Görülən bütün bu işlər Azərbaycanda güclü dövlətçiliyin və dövlətin mövcud olması və bu güclü dövlətin başında məhz Azərbaycan Respublikasının Prezidenti cənab İlham Əliyevin durması sayəsində baş tutmuşdur.

Bu gün Azərbaycan demokratiyanın inkişafı yolu ilə inamla getməkdədir. Azərbaycanda vətəndaş cəmiyyəti strukturlarının sayı günü-gündən artmaqdadır. İndi Azərbaycanda 60-dan çox siyasi partiya, 3 mindən çox QHT və 600-dən çox KİV vardır. Bu gün Azərbaycanda azad media vardır. Bu gün Azərbaycanda hüquqi dövlət vardır. Bu gün Azərbaycanda şəffaf idarəetmə vardır.

Fikrimi isə bu gün təqdimat mərasiminə toplaşdığımız kitabda cənab Prezidentin nitqindən verilmiş bir iqtibasla bitirmək istəyirəm: “İndi bizim qarşımızda nadir imkanlar var. Elə etməliyik ki, güclü dövlət yaradaq, müstəqilliyimizi daha da möhkəmləndirək, Azərbaycanın potensialını tam şəkildə insanların həyat səviyyəsinin yaxşılaşmasına yönəldək və beləliklə, ölkəmizdə vətəndaş cəmiyyəti yaradaq. Azad cəmiyyət, hüquqi dövlət, qanunun aliliyi, güclü iqtisadiyyat, güclü ordu, çevik xarici siyasət və Azərbaycanın maraqlarının tam şəkildə qorunması və möhkəmlənməsi – bu, bizim qarşımızda duran əsas qlobal istiqamətlərdir”.

Biz gənclər cənab Prezidentin bütün fikirlərini dəstəkləyir və bəyan edirik ki, bu yolla inamla gedəcəyik, Azərbaycanı layiq olduğu zirvələrə qaldıracağıq və inşallah, ən qısa zamanda Azərbaycanımızın yaralı yeri olan işğal altındakı torpaqlarımızı azad edəcəyik.

Məqsədlərimizə doğru gedən yolda “Prezidentlə irəli!” deyir, diqqətinizə görə minnətdarlığımı bildirirəm. Sağ olun.