QAN YADDAŞI
“XABAD OR AVNER” MƏKTƏBİNİN KOLLEKTİVİ QANLI YANVAR ŞƏHİDLƏRİNİN XATİRƏSİNİ ANMIŞDIR
Bakı, 19 yanvar (AZƏRTAC). “XABAD Or Avner” yəhudi məktəbinin kollektivi Şəhidlər xiyabanında olmuş, 1990-cı il Qanlı Yanvar faciəsi qurbanlarının xatirəsini anmışdır.
“XABAD Or Avner” Bakı təhsil kompleksinin baş direktoru ravvin Matityaqu Luis, məktəbin ictimaiyyətlə əlaqə üzrə icraçı direktoru Samir Xanlarov, müəllimlər və şagirdlər faciə qurbanlarının məzarları üzərinə gül qoymuş, Azərbaycanın müstəqilliyi və ərazi bütövlüyü uğrunda canlarından keçmiş vətən oğullarının xatirəsini yad etmişlər.
Ziyarətdən sonra M.Luis və S.Xanlarov vurğulamışlar ki, 1990-cı il yanvarın 20-də müstəqillik uğrunda tökülən qan çoxmillətli Azərbaycanı birləşdirdi. Qara Yanvar hadisələri bir daha dünyaya sübut etmişdir ki, Azərbaycanda yaşayan bütün millətlərin nümayəndələri xeyirdə də, şərdə də birdirlər. Azərbaycan oğul və qızlarının 20 il əvvəl göstərdiyi qəhrəmanlıq Vətənə sonsuz məhəbbət nümunəsidir. Biz “XABAD Or Avner”in şagirdlərini də bu ruhda tərbiyə edirik.