Xalq Şairi Hüseyn Arifin xatirəsi anılıb
Ağstafa, 18 sentyabr, Famil Quliyev, AZƏRTAC
Ağstafa şəhərindəki Yazıçılar Evində Xalq Şairi Hüseyn Arifin xatirəsinə həsr olunmuş ədəbi-bədii gecə keçirilib.
AZƏRTAC xəbər verir ki, tədbiri rayon icra hakimiyyəti başçısının müavini Lalə Eyyubova açaraq, Azərbaycan poeziyasının tanınmış nümayəndəsi, dövlət mükafatı laureatı, Xalq Şairi Hüseyn Arifin milli ədəbiyyatımıza dəyərli töhfələr verdiyini qeyd edib.
Bildirilib ki, Hüseyn Arif müasir Azərbaycan poeziyasında özünəməxsus yeri və mövqeyi olan şairlərdəndir. Onun əsərləri və şeirləri xalqımız tərəfindən sevilə-sevilə oxunur.
Sonra Əməkdar İncəsənət Xadimi, şair Barat Vüsal, yazıçı-jurnalist Firdovsi Heydərli, şair Saqif Qaratorpaq, “Ağstafa” qəzetinin baş redaktoru İbrahim Əliyev və rayon ziyalısı Baba Babanlı çıxış edərək, şairin həyat və fəaliyyəti haqqında tədbir iştirakçılarına ətraflı məlumat veriblər.
Tədbir rayon mədəniyyət və incəsənət nümayəndələrinin hazırladığı konsert proqramı ilə yekunlaşıb.
Bölmənin digər xəbərləri
