XALQIMIZ ŞƏHİDLƏRİN QƏHRƏMANLIĞINI HEÇ ZAMAN UNUTMAYACAQ
Bakı, 19 yanvar (AZƏRTAC). Yanvarın 19-da Rabitə və İnformasiya Texnologiyaları Nazirliyində 20 Yanvar faciəsinin 20-ci ildönümünə həsr olunmuş tədbir keçirilmişdir.
Nazir Əli Abbasov xalqımızın tarixinə qanla yazılmış 20 Yanvar faciəsinin səbəblərindən və mahiyyətindən danışmışdır. Bildirmişdir ki, itkilərə və günahsız insanların qətlinə gətirib çıxaran 20 Yanvar faciəsi SSRİ rəhbərliyinin Azərbaycana qarşı xəyanətkar siyasətinə dözməyən, öz azadlığına, müstəqilliyinə can atan xalqımızın mübarizliyini, əyilməzliyini, məğrurluğunu bir daha nümayiş etdirmişdir.
Ə.Abbasov respublikanın o zamankı rəhbərliyinin xəyanəti nəticəsində xalqımıza qarşı törədilmiş qanlı qırğının siyasi-hüquqi qiymətinin yalnız ümummilli liderimiz, ulu öndər Heydər Əliyevin hakimiyyətə qayıdışından sonra verildiyini vurğulamışdır.
Tədbirdə çıxış edənlər 20 Yanvar qırğınını qətiyyətlə pisləmiş, xalqımızın azadlıq və müstəqillik uğrunda apardığı qəhrəmanlıq mübarizəsindən danışmışlar.
Sonra nazir Əli Abbasov rabitəçi şəhid ailələri ilə görüşmüş, onların problemləri ilə maraqlanmışdır.
Bölmənin digər xəbərləri
