Bakı, 2 noyabr, AZƏRTAC

Zəfər Günü xalqımızın şərəfli qəhrəmanlıq səhifəsidir. Həmin gün məğlub xalqın qalib xalqa çevrildiyi tarixdir. Son 200 ildə xalqımız çoxlu haqsızlıqlarla və soyqırımları ilə üzləşib. Belə ki, Cənubi Qafqaza aidiyyəti olmayan erməni toplumu zaman-zaman xalqımıza qarşı ədalətsizliklər törədərək, düşünülmüş şəkildə Azərbaycan torpaqlarına köçürülmüşdü. Bu köçü daha uğurlu etmək üçün ermənilər 1905-1907, 1918-1920, 1948-1953, 1987-1988-ci illərdə soyqırımları törədib və soydaşlarımızı öz doğma yurdlarından didərgin salıblar. 1990-cı illərin əvvəlində başlanmış Qarabağ müharibəsində isə Ermənistan ərazilərimizin 20 faizini işğal edərək 750 mindən çox azərbaycanlının öz doğma yurdlarında məcburi köçkün vəziyyətinə düşməsinə səbəb olub. BMT Təhlükəsizlik Şurasında Ermənistanın işğal etdiyi ərazilərimizdən qeyd-şərtsiz çıxmasına dair 4 qətnamə qəbul olunmasına baxmayaraq, rəsmi İrəvan beynəlxalq hüququ heçə saydı. Münaqişənin dinc yolla həll olunmasına dəstək məqsədilə yaradılan ATƏT-in Minsk qrupu da heç bir iş görmədi. Hətta torpaqlarımızda erməni işğalını əbədiləşdirməyə çalışdı. Amma xalqımız bu məğlubiyyətlə barışa bilməzdi. Ulu Öndər Heydər Əliyevin hakimiyyətə qayıdışından sonra onun rəhbərliyi altında 1993-cü ilin dekabrından başlamış Horadiz əməliyyatı ilə düşməni dayandırmaqla müvəqqəti atəşkəsə məcbur edə bildik. Təbii ki, Azərbaycana dövləti formalaşdırmaq və gücləndirmək üçün vaxt lazım idi. Məhz Ulu Öndərin siyasi kursu sayəsində Azərbaycanda müstəqil dövlətçiliyin əsasları formalaşdı.

Bu sözləri AZƏRTAC-a açıqlamasında Milli Məclisin deputatı Azər Badamov söyləyib.

O bildirib ki, 2003-cü ildə səs çoxluğu ilə xalqın etimadını qazanıb dövlətimizə rəhbər seçilən Prezident İlham Əliyevin ən başlıca hədəfi torpaqların işğaldan azad olunması idi. Beləliklə, ölkəmizdə çoxsaylı islahatlar aparılaraq iqtisadiyyat gücləndirildi. Dövlət büdcəsindən ən çox maliyyə müdafiə sahəsinə ayrılaraq, inkişaf etdirildi, ordumuz gücləndirildi və beynəlxalq təşkilatlarda ölkəmizin ədalətli mövqeyini müdafiə edən sənədlər qəbul etdirilərək hüquqi baza yaradıldı. Nəhayət, Zəfərə gedən yolun hazırlıq prosesi başa çatmaq üzrə idi. Azərbaycan Silahlı Qüvvələri düşmən ordusundan dəflərlə çox potensiala malik idi. Bunun ən bariz nümunəsi isə düşmənin mütəmadi şəkildə törətdiyi təxribatlarda qarşı tərəfə vurulan sarsıdıcı zərbələr idi. Amma Ermənistan reallığı dəyərləndirməyərək Azərbaycana qarşı yeni ərazilər uğrunda yeni müharibə ritorikası ilə çağırışlar etməyə başladı. O cümlədən 2018-ci ildə hakimiyyətə gələn Nikol Paşinyan Cıdır düzündə rəqs edib, “Qarabağ Ermənistan”dır şüarları səsləndirməyə başladı. Halbuki, N.Paşinyan hakimiyyətə gəldiyi ilk günlərdə Azərbaycandan ona vaxt verməsini xahiş edərək münaqişəni yoluna qoyacağı barədə vəd vermişdi. Amma siyasi simasızlıq göstərən Nikol Qarabağ məsələsində digər erməni liderlərindən heç bir fərqinin olmadığı nümayiş etdirdi. “Valday” Beynəlxalq Diskussiya Klubunda Prezident İlham Əliyev beynəlxalq ictimaiyyət qarşısında çıxış edərək “Qarabağ Azərbaycandır və nida işarəsi” deməklə Ermənistanın baş nazirinə adekvat cavab verdi. Bu baxımdan da Ermənistan hərbi-siyasi rəhbərliyinin sülh prosesinə zərbə vuran davranışları İkinci Qarabağ müharibəsini qaçılmaz edirdi.

“2020-ci il sentyabrın 27-də yenidən geniş təxribatlar törədən Ermənistanın bu addımı Azərbaycanın səbir kasasını daşdıran son damla oldu. Beləliklə, Prezident İlham Əliyev tərəfindən bütün cəbhəboyu əks-hücuma keçmək əmri verildi. Ordumuz müharibənin ilk günündən başlayaraq müvəffəqiyyətlər qazanmağa başladı. On minlərlə gəncimiz könüllü şəkildə ordu sıralarına yazıldı. Hətta xaricdə yaşayan gənclərimiz də ölkəyə qayıdaraq əlinə silah götürüb haqq işimizə dəstək verdilər.

Qırx dörd günlük müharibə xalqımız üçün Vətən müharibəsi idi və bu adla da Azərbaycan tarixinə düşdü. Otuz il erməni işğalından əziyyət çəkən Azərbaycan xalqı Xocalının, Xocavəndin, Zəngilanın, Başlıbelin, Qaradağlının və digər soyqırımlarının qisasını almaq, tarixi ədaləti bərpa etmək üçün tələsirdi. Vandalizm törədən ermənilərdən fərqli olaraq Azərbaycanın qalib gəldiyi müharibənin hər bir günü beynəlxalq hüququn normaları çərçivəsində həyata keçirildi. Xalqımız hər axşam televiziya ekranlarının qarşısında oturub Prezident İlham Əliyevin qələbə tvitlərini gözləyirdi. Nəhayət noyabrın 8-də şanlı Ordumuzun Şuşanı azad etməsi xalqımıza unudulmaz qələbə sevinci yaşatdı.

Azərbaycanla hərbi ritorika ilə danışan erməni cinayətkarlar 44 gündə məğlubiyyətə uğradıldı. Məhz Paşinyanın yalvarışlarına görə, noyabrın 10-da üçtərəfli Bəyanat imzalanaraq münaqişənin həll olunması üçün atəşkəs elan edildi, digər məsələlərin siyasi yollarla həllinə qərar verildi. Beləliklə, kapitulyasiya nəticəsində Ağdam, Kəlbəcər və Laçın rayonları Ermənistan tərəfindən boşaldılsa da, öz xislətini növbəti dəfə nümayiş etdirən rəsmi İrəvan bir müddət sonra üçtərəfli Bəyanata əməl etmədi. Buna görə də biz öz gücümüzlə bu bəyanatın müddəalarını Ermənistana icra etdirməyə məcbur olduq. Belə ki, 2023-cü il sentyabrın 20-də keçirilən lokal xarakterli antiterror tədbirləri ilə Qarabağda erməni separatizminin kökü kəsildi. Bakıda çay içmək arzusunda olan separatçıların rəhbərləri “arzularına” çatdı və bu gün DTX-nin təcridxanasında çay içirlər. Bakıda tankların hərəkət edəcəyini arzulayan Ermənistan rəhbərliyinin də arzusunu yerinə yetirdik və döyüş meydanında qənimət olaraq götürülmüş erməni tankları və döyüş texnikaları Zəfər paradımızda nümayiş olundu. Beləliklə, rəşadətli Ordumuz və xalqımız “dəmir yumruğ”a çevrilərək 200 illik arzunu reallaşdırdı”, - deyə A.Badamov vurğulayıb.

Deputat əlavə edib ki, bu gün işğaldan azad olunmuş ərazilərimiz yenidən qurularaq cənnətə çevrilir. Uzun illər məcburi köçkünlük həyatını yaşamağa məcbur olmuş insanlar öz doğma yurdlarına qayıdaraq yenidən firavan və dinc həyatlarına qovuşublar. Bu gün Azərbaycan qlobal problemlərin həll olunmasına ev sahibliyi edir, ölkəmizin təşəbbüsləri dünya tərəfindən qəbul olunur. Azərbaycan heç vaxt indiki qədər güclü olmayıb. Bütün bu uğurlarımız isə uzaqgörən və vaxtında qərarlar qəbul etmək bacarığı olan Prezident İlham Əliyevin praqmatik siyasətinin nəticəsidir.