XARİCİ MƏTBUAT SƏHİFƏSİNDƏ
AZƏRBAYCANIN YENİ İLHAMI Türkiyənin yüksək tirajlı və nüfuzlu “Təqvim” qəzetinin 7 iyul 2003-cü il tarixli nömrəsində ölkənin tanınmış siyasətçisi, Mərmərə Qrupu Strateji və Sosial Araşdırmalar Vəqfinin sədri doktor Akkan Suverin “Azərbaycanın yeni İlhamı” adlı məqaləsi dərc edilmişdir. AZƏRTAC həmin məqaləni oxuculara təqdim edir. Azərbaycan siyasəti yeni bir mərhələyə qədəm qoymaq üzrədir. Bu yeni mərhələnin ilk işarəsi Naxçıvanda yaradılmış təşəbbüs qrupunun təklifi ilə ötən həftənin cümə günü İlham Heydər oğlu Əliyevin namizədliyinin Mərkəzi Seçki Komissiyasında qeydə alınması ilə özünü göstərdi. Bəli, YAP sədri və Prezident Heydər Əliyevin oktyabırın 15-də keçiriləcək prezident seçkilərində namizədliyi rəsmən açıqlandıqdan sonra həmin partiyanın sədr müavini, Milli Məclisin deputatı İlham Əliyevin də namizədliyinin elan edilməsi Azərbaycanda yeni bir siyasi mərhələnin özünəməxsus amillərini də ortaya qoydu. Azərbaycanın siyasi həyatında həlledici proses olan prezident seçkiləri yalnız Azərbaycan üçün deyil, həmçinin Türkiyə üçün də fövqəladə əhəmiyyət kəsb etməkdədir. Söhbət etdiyimiz bakılı seçicilərin fikrincə, 15 nəfərə yaxın namizəd arasında Heydər Əliyev və İlham Əliyev istisna olmaqla digərlərinin şansı çox azdır. Biz jurnalist İrfan Ülkü ilə birlikdə keçirdiyimiz rəy sorğusu zamanı buna şəxsən şahid olduq. Azərbaycanda prezident seçkilərinin yalnız Türkiyə-Azərbaycan əlaqələri baxımından deyil, habelə Qafqaz regionunda sabitliyin qorunması nöqteyi-nəzərindən böyük əhəmiyyət daşıdığını ifadə edən azərbaycanlılar bu seçkidən sonra Ermənistanla münasibətlərin tamamilə yeni bir müstəvi üzərinə keçiriləcəyinə inanırlar. Bu seçkidən sonra Dağlıq Qarabağ məsələsi də ayrı bir mahiyyət kəsb edəcəkdir. Lissabonda bütün dünya ölkələrinə Ermənistanın işğalçı olduğunu qəbul etdirən Heydər Əliyevin yüksək nailiyyətlərini yalnız İlham Əliyev kimi Şərq və Qərb dünyasını yaxından tanıyan bir şəxsiyyətin davam etdirə biləcəyi düşüncəsi bütün azərbaycanlılara hakim kəsilmişdir. Onların fikrincə, İlham Əliyev bu seçkilərdə yalnız Heydər Əliyevin oğlu kimi iştirak etmir. O, Avropa Şurası Parlament Assambleyası sədrinin müavini və Büro üzvü vəzifələrinə yüksəlmiş, bununla da Avropada öz layiqli yerini almış bir deputatdır. Milli Olimpiya Komitəsinin prezidenti kimi İlham Əliyev bütün dünya ilə yaxşı münasibətlər qurmuş yetkin bir siyasi xadimdir. Üstəlik, illərdən bəri yürütdüyü beynəlxalq neft siyasətində səmərəli fəaliyyətinə görə Amerikadan tutmuş Avstraliyaya qədər beynəlxalq ticarət sahəsində bişib-bərkimişdir. Prezidentlik son dərəcə məsul bir işdir. O, təcrübə, bilik, əlaqə və hər şeydən də əvvəl ölkəsini və bölgəsini zamanın tələblərinə uyğunlaşdıracaq enerji və böyük dünyagörüşü tələb edir. Bütün bunlar məhz İlham Əliyevin şəxsiyyətində cəmləşmiş xüsusiyyətlərdir. Azərbaycanda prezidentliyə namizədlər nə qədər çox olsa da, təhsilin, savadın, biliyin məntiqi, sağlam düşüncənin və məsuliyyətin məntiqi azərbaycanlılarda belə bir inam oyadır ki, İlham Əliyev ölkəni inkişaf etdirməyə qadir bir siyasətçidir. Bu fikrə ürəkdən inanan azərbaycanlılar hər addımda qarşımıza çıxırdı. Türkiyənin uğurlu siyasətçilərindən biri olan mərhum Turqut Özal da İlham Əliyev kimi həm dövlətdə, həm də özəl sektorda müvəfəqiyyətlə çalışmış bir şəxsiyyət idi. Onun uğur qazanmasının ən mühüm şərtlərindən biri həm dövləti, həm də özəl sektoru mükəmməl tanıması, bilməsi idi. Bakıda ona da inandıq ki, Özalın fəaliyyətinin miqyas və ölçülərinin İlham Əliyev tərəfindən təkrarlanacağını bilməyən yoxdur. Namizədlərin çoxluğuna gəlincə, İrfan Ülkü dedi: “Azərbaycanın böyük şairi Bəxtiyar Vahabzadənin bir şerində deyilir ki, hər kəs bu ölkənin başında durmaq, bu ölkəyə prezident olmaq istəyir”. Namizədlərin bugünkü çoxluğu Vahabzadənin haqlı olduğunu bir daha sübuta yetirmirmi? Namizədlər nə qədər çox olsa da, xalq ən layiqlisini seçəcəkdir.
Bölmənin digər xəbərləri
