Xəbər agentlikləri informasiya istehsalı ilə bağlı texnologiyalar sahəsində necə əməkdaşlıq edirlər
Bakı, 3 iyun, AZƏRTAC
Bu gün jurnalistikanın üzləşdiyi problemləri görmək üçün heç də informasiya sahəsində çalışmaq vacib deyil. Bütün dünyada fəaliyyət göstərən media qurumları auditoriyanın marağını cəlb etmək və qoruyub saxlamaq üçün mübarizə aparır, naşirləri və yayım şirkətlərini, yeni texnikaları və gəlir gətirən strategiyaları cəlb etməyə çalışırlar. Bu çətin sahədə ən azı bir işıqlı nöqtə görünür ki, bu da informasiya istehsalı ilə məşğul olan qurumların daha çox əməkdaşlıq etməsidir.
AZƏRTAC xəbər verir ki, bu fikirlər Asiya və Sakit Okean Ölkələri İnformasiya Agentlikləri Təşkilatının (OANA) İcraiyyə Komitəsinin Vyetnamın Hanoy şəhərində keçirilmiş 44-cü iclasında “Superdesk” proqramını təqdim edən “Sourcefabric” şirkətinin saytında yerləşdirilmiş məlumatda yer alıb.
Məlumatda deyilir ki, “Kooperativ jurnalistika” erasına mühüm töhfələrdən biri də OANA İcraiyyə Komitəsinin aprelin 18-20-də Hanoy şəhərində keçirilmiş bu tədbiri oldu. Tədbirin əsas iştirakçılarından biri də “Sourcefabric” şirkəti idi. OANA İcraiyyə Komitəsinin AZƏRTAC-ın sədrliyi və Vyetnam Xəbər Agentliyinin ev sahibliyi ilə keçirilən 44-cü iclasının gündəliyində feyk xəbərlərə qarşı mübarizə və mediaya etibarın bərpa olunması kimi mövzular dururdu.
Həmin iclas zamanı innovasiya və texnologiyanın rolu mövzusunun müzakirəsinə geniş yer verilmişdi. “Sourcefabric”in layihə üzrə meneceri Karel Petrak və biznesin inkişafı üzrə meneceri Renat İş iclasdakı çıxışlarında bildirdilər ki, əgər media qurumlarının fəaliyyətinin təkmilləşdirilməsindən söhbət gedirsə, burada əməkdaşlıq vacib şərtlərdən biridir. Çıxışlarda qeyd edildi ki, OANA-nın üzvləri də daxil olmaqla, bir çox media qurumlarının üzləşdiyi ən böyük problemlərdən biri də yanlış məlumatlandırma və onunla mübarizədə texnologiyadan necə istifadə edilməsi məsələsidir.
OANA-nın prezidenti, AZƏRTAC-ın İdarə Heyətinin sədri Aslan Aslanov iclasdakı çıxışında deyib ki, təşkilatın İcraiyyə Komitəsinin tədbirləri xəbər agentliklərinin qarşılaşdığı problemlərin müzakirə edilməsi baxımından yaxşı platformadır. OANA-nın prezidenti “Sourcefabric” şirkətinin Asiya və Sakit Okean Ölkələri İnformasiya Agentlikləri Təşkilatının son iclaslarında iştirak edərək proqram təminatlarının rəqəmsal dövrdə informasiya agentliklərinin fəaliyyət səmərəliliyinin artırılmasına necə təsir etdiyinə aydınlıq gətirməsinin təqdirəlayiq olduğunu deyib.
İnformasiyada OANA-nın yaranma tarixi və fəaliyyəti haqqında da məlumat verilir. Bildirilir ki, 1961-ci ildə UNESCO-nun himayəsi ilə yaradılan OANA 35 ölkənin 44 agentliyini öz ətrafında birləşdirir. AZƏRTAC 2016-cı ildən bu təşkilata sədrlik edir.
Bölmənin digər xəbərləri
