XƏTAİ RAYONUNUN TƏHSİL İŞÇİLƏRİ YENİ DƏRS İLİNDƏ QARŞIDA DURAN VƏZİFƏLƏRİ MÜZAKİRƏ ETMİŞLƏR
Rayon təhsil şöbəsinin müdiri Məhəmməd Bayramov 2003/2004-cü dərs ilinin yekunları və təhsilin müasir yanaşmalar əsasında inkişaf etdirilməsi sahəsində qarşıda duran vəzifələrdən danışmışdır. Rayonun qabaqcıl müəllimlərinin iş təcrübəsindən, şagirdlərin bir sıra fənn olimpiadalarında qazandıqları uğurlardan söhbət açmış, bu il 3 min 968 məzundan 1738 nəfərinin ali məktəblərə qəbul olunduğunu vurğulamışdır.
Rayon icra hakimiyyətinin başçısı İbrahim Mehdiyev, Bakı Baş Təhsil İdarəsinin rəis əvəzi Fərzəli Qədirov və başqaları çıxış edərək Prezident İlham Əliyevin “Azərbaycan Respublikasında “Bilik günü”nün təsis edilməsi və təhsil müəssisələrində iş rejiminin tənzimlənməsi haqqında” Fərmanı və “Azərbaycan Respublikasında ümumtəhsil məktəblərinin informasiya və kommunikasiya texnologiyaları ilə təminatı Proqramının (2005-2007-ci illər) təsdiq edilməsi haqqında” Sərəncamını ölkəmizdə təhsilin inkişafına göstərilən diqqət və qayğının yeni təzahürü olduğunu diqqətə çatdırmış, təhsil islahatlarının həyata keçirilməsi ilə bağlı qarşıda duran mühüm vəzifələrdən danışmış, müəllimləri yeni dərs ili və “Bilik günü” münasibətilə təbrik etmişlər.
Sonra təhsildə fərqlənmiş bir qrup müəllimə diplomlar təqdim olunmuşdur.
Konfrans iştirakçıları Prezident İlham Əliyevə müraciət qəbul etmişlər.
