Xeyirxah təşəbbüs: “İki aldığından birini ianə et”
Kürdəmir, 13 aprel, AZƏRTAC
Koronavirus pandemiyası təhlükəsi ilə əlaqədar tətbiq olunan gücləndirilmiş karantin rejimi şəraitində Kürdəmirdə yüzlərlə tənha ahıl sakinə, habelə aztəminatlı ailələrə ərzaq yardımı göstərilib.
Rayon icra hakimiyyətindən AZƏRTAC-ın bölgə müxbirinə bildirilib ki, aparatın işçiləri, inzibati ərazi dairəsi üzrə nümayəndələr, bələdiyyə üzvləri, sahibkarlar və imkanlı vətəndaşlar “Biz birlikdə güclüyük” kampaniyası çərçivəsində şəhər, qəsəbə və kəndlərdə 200 ailəyə ərzaq yardımı paylayıblar. Ümumiyyətlə, indiyədək yardım alan ailələrin sayı 700-ü ötüb. Yardımlar sakinlərin evlərinə aparılır.
Qeyd edək ki, karantin rejimi şəraitində Kürdəmirin bəzi ərzaq mağazalarında karantin dövründə “İki aldığından birini ianə et” kampaniyası da davam edir. Belə ki, imkanlı mağaza sahibləri alış-veriş edən aztəminatlı ailələrin pulsuz çörəklə və digər zəruri ərzaq malları ilə təminatına yardım göstərirlər.
Bölmənin digər xəbərləri
