XILLI “NƏRƏ” BALIQARTIRMA ZAVODUNUN AÇILIŞ MƏRASİMİ
NEFTÇALA RAYON İCRA HAKİMİYYƏTİNİN BAŞÇISI FƏZAİL ALIŞOVUN ÇIXIŞI
Əziz toplantı iştirakçıları!
Bu gün Neftçala rayonu ictimaiyyətinin həyatında ən əlamətdar və yaddaqalan günlərdən biridir. Sözün əsl mənasında, bizim hamımızın bayramıdır. Bu gün Azərbaycan Respublikasının Baş naziri, Azərbaycan Respublikası prezidentliyinə namizəd İlham müəllim möhtərəm Prezidentimiz cənab Heydər Əliyevin böyük diqqət və qayğısı ilə tikilmiş, əhalinin müəyyən qisminin işlə təmin olunmasına kömək göstərəcək balıqartırma zavodunun açılışı mərasiminə gəlmişdir.
Cənab Baş nazir, icazə verin, Sizi rayonumuzun bütün ictimaiyyəti adından salamlayım və Neftçalaya “Xoş gəlmisiniz!” deyim.
Rayonumuzun bütün zəhmətkeşləri hələ də xoş bir hadisənin dərin təsiri altındadır. Sizin Azərbaycan Respublikasının Baş naziri təyin olunmağınız bütün xalqımız kimi, neftçalalıları da hədsiz sevindirmişdir. Möhtərəm Prezidentimizin bu müdrik addımını rayonumuzun sakinləri də ürəkdən bəyənir və yüksək qiymətləndirirlər. Fürsətdən istifadə edib, Sizi bu yüksək təyinat münasibətilə ürəkdən təbrik edir, Sizə xalqımızın rifahı naminə yorulmaz fəaliyyətinizdə yeni-yeni uğurlar arzulayıram.
Neftçala rayonu inzibati vahid kimi möhtərəm Heydər Əliyevin təşəbbüsü ilə 1973-cü ildə yaranmışdır. Ötən illər ərzində cənab Heydər Əliyevin diqqət və qayğısı sayəsində rayonumuz sosial-iqtisadi baxımdan xeyli inkişaf etmiş və möhkəmlənmiş, respublikada öncül yerlərdən birini tutmuşdur. Cənab Heydər Əliyevin respublikaya rəhbərlik etdiyi əvvəlki illərdə rayonumuzda geniş miqyasda tikinti-quruculuq işləri aparılmış, 750 yerlik müasir tipli mədəniyyət və incəsənət sarayı, hər cür şəraiti olan 250 yerlik xəstəxana kompleksi və 600 xəstəni qəbul edən poliklinika, 160 yerlik mehmanxana, Neftçala yod-brom zavodu, pambıqtəmizləmə zavodu, Kür çayı üzərindən 2 körpü, onlarca beşmərtəbəli yaşayış binası, inzibati binalar, çoxlu sayda təhsil, mədəniyyət obyektləri, o cümlədən məktəblər, kitabxanalar, uşaq bağçaları tikilib istifadəyə verilmişdir.
Həmin illər ərzində rayonumuz təkcə sənayesi ilə deyil, eyni zamanda, kənd təsərrüfatının sürətli inkişafı ilə də respublikamızda tanınmışdı. Belə ki, rayonumuz hər il 35 min ton taxıl, 40 min ton pambıq istehsalı ilə yanaşı, heyvandarlıq sahəsində də yüksək nailiyyətlər əldə etmişdi.
Lakin AXC-Müsavat cütlüyünün hakimiyyətdə olduğu 1992-ci ildə, respublikamızın hər yerində olduğu kimi, rayonumuzun da iqtisadiyyatı səriştəsiz rəhbərlərin fəaliyyətsizliyi ucbatından dağıdıldı. 1993-cü ildə xalqımızın təkidli tələbi ilə yenidən hakimiyyətə qayıdan cənab Heydər Əliyevin apardığı uğurlu siyasət, bütün ölkədəki kimi, rayonumuzda da əsl iqtisadi dirçəlişə şərait yaratdı. Uğurlu aqrar islahatlar həyata keçirildi, 39548 hektar torpaq sahəsi özəlləşdirilərək 8134 ailənin xüsusi mülkiyyətinə verildi. Bununla da kəndlərdə sahibkarlığın inkişafına şərait yaradıldı. Artıq aqrar islahatlar öz bəhrəsini verməkdədir. Rayonumuz hazırda özünün daxili tələbatını ödəməklə yanaşı, respublikamızın iri şəhərlərinə də kənd təsərrüfatı məhsulları satır. Bütün bunlar cənab Prezidentimizin həyata keçirdiyi aqrar islahatların uğurlu nəticəsidir.
Bu gün rayonumuz tərəqqi və inkişaf yolundadır. Möhtərəm Prezidentimiz cənab Heydər Əliyevin Gəncə şəhərində keçirdiyi müşavirədən sonra rayonumuzda da geniş tikinti-quruculuq işlərinə başlanılmışdır. Əhalinin qaza olan tələbatını ödəmək üçün ötən ilin oktyabrında bir qaz quyusu da qazılıb istifadəyə verilmiş, Neftçala şəhərini, Bankə qəsəbəsini və ətraf kəndləri mavi yanacaqla təmin etmək üçün 26 kilometr uzunluğunda yeni qaz xətti çəkilib istifadəyə verilmişdir. Xıllı qəsəbəsi isə bütövlüklə qazlaşdırılmışdır.
Şəhərin və kəndlərimizin abadlaşdırılması istiqamətində xeyli işlər görülmüşdür. Şəhərdə 13 min kvadratmetr sahədə asfalt döşənmiş, kəndarası yollar təmir olunmuşdur. Neftçala şəhər mədəniyyət və incəsənət sarayı əsaslı təmir olunmuş, ümumtəhsil orta məktəblərində və uşaq bağçalarında təmir işləri aparılmışdır. Əhalinin içməli suya olan tələbatını ödəmək üçün mövcud su kəməri və su anbarları təmir olunub istifadəyə verilmişdir.
Kür çayının səviyyəsinin qalxması ilə əlaqədar olaraq əhalini təbii fəlakətdən xilas etmək üçün bilavasitə möhtərəm Prezidentimizin diqqət və qayğısı ilə dövlət vəsaiti hesabına 600 milyon manatlıq bəndvurma işləri görülmüşdür. Hazırda Kürün deltasının təmizlənməsi istiqamətində intensiv işlər aparılır.
Cənab Baş nazir, bu gün açılışına toplaşdığımız “Nərə” balıqartırma zavodu möhtərəm Prezidentimizin neftçalalılara ən böyük töhfəsidir. Bu, 100 nəfərdən artıq insanın iş yeri ilə təmin olunması deməkdir. Mən buna görə cənab Prezidentimiz Heydər Əliyevə və Sizə neftçalalılar adından minnətdarlığımı və təşəkkürümü bildirirəm.
Bu günlər xalqımız seçim qarşısındadır. 15 oktyabr prezident seçkiləri günüdür. Əslində, xalqımız özünün ümummilli lideri Heydər Əliyevi hələ 1993-cü ildə həmişəlik Prezident seçmişdir. Əmin ola bilərsiniz ki, 15 oktyabrda bütün neftçalalılar seçkilərdə fəal iştirak edəcək, müstəqil ölkəmizin işıqlı gələcəyinə səs verəcəklər.
Bölmənin digər xəbərləri
