Xızıda şəhid Vidadi Allahverdiyevin xatirəsi anılıb
Xızı, 13 mart, Elxan Yusifli, AZƏRTAC
Martın 13-də Xızı rayonu Giləzi qəsəbəsində Vətən müharibəsində şəhidlik zirvəsinə ucalan kiçik çavuş Vidadi Allahverdiyevin xatirəsi anılıb.
AZƏRTAC-ın bölgə müxbiri xəbər verir ki, şəhidin doğum günü münasibətilə təşkil olunan anım mərasiminin iştirakçıları əvvəlcə Vidadi Allahverdiyevin məzarını ziyarət edib, ruhuna dualar oxuyublar.
Mikayıl Müşfiq adına Giləzi qəsəbə tam orta məktəbdə keçirilən tədbirdə şəhidin valideynləri, rayon icra hakimiyyətinin, hüquq-mühafizə orqanlarının, təhsil şöbəsinin nümayəndələri iştirak ediblər.
Çıxış edənlər Vidadi Allahverdiyevin şərəfli ömür və döyüş yolundan, Vətən müharibəsində qazanılan şanlı qələbəmizdən danışıblar.
Bildirilib ki, Vidadi Allahverdiyev döyüşün ilk günündən həmlə qrupunda düşmənin üzərinə atılan qəhrəman oğullarımızdan biridir. Müddətdən artıq həqiqi hərbi xidmət keçən Vidadi Ağdərə istiqamətində gedən döyüşlərdə şəhidlik zirvəsinə ucalıb.
Bildirilib ki, Ermənistan silahlı qüvvələrinin sentyabrın 27-də ölkəmizə qarşı başladığı növbəti təxribatçılıq əməllərinə cavab olaraq Müzəffər Ali Baş Komandan İlham Əliyevin rəhbərliyi altında rəşadətli Azərbaycan Ordusunun həyata keçirdiyi əks-hücum əməliyyatları nəticəsində düşmən ağır məğlubiyyətə uğradı. 44 gün davam edən Vətən müharibəsi Azərbaycan Ordusunun şanlı zəfəri ilə başa çatdı, əzəli Qarabağ torpaqlarımız erməni faşizmindən azad olundu.
Qələbə xalqımıza asan başa gəlmədi, şəhidlərimiz, yaralılarımız oldu. Azərbaycanın elə bir bölgəsi tapılmaz ki, orada Vətən müharibəsinin ağrısı, acısı hiss olunmasın. Xızı rayonu da torpaqlarımızın işğaldan azad edilməsi uğrunda başlanan Vətən savaşına yüzlərlə qəhrəman övladını yola salıb, şəhidlər verib. Onların əziz xatirəsi daim uca tutulur, ehtiramla anılır.
Şəhidin qardaşı Cəfərqulu Allahverdiyev bildirib ki, Vətən müharibəsində düşmənə qan udduran igidlərimiz ölümün gözünə dik baxdılar. Otuz ilə yaxın müddətdə işğal altında olan torpaqlarımız onların qəhrəmanlıqları nəticəsində azad edildi.
Azərbaycanın ərazi bütövlüyünün təmin edilməsi uğrunda qəhrəmanlıqla döyüşdüyünə görə Vidadi Allahverdiyev ölümündən sonra "Vətən uğrunda" medalı ilə təltif olunub.
Anım mərasimində Vətən müharibəsindəki qələbəmizə həsr olunan videoçarx nümayiş etdirilib, məktəblilər vətənpərvərlik ruhunda şeirlər səsləndiriblər.
Bölmənin digər xəbərləri
