Xocalı faciəsi qurbanlarının xatirəsi Azərbaycan Dövlət Pedaqoji Universitetində anılmışdır
Bakı, 24 fevral (AZƏRTAC). Fevralın 24-də Azərbaycan Dövlət Pedaqoji Universitetində (ADPU) Xocalı soyqırımı qurbanlarının xatirəsini anma mərasimi keçirilmişdir.
AZƏRTAC xəbər verir ki, əvvəlcə faciə qurbanlarının xatirəsi bir dəqiqəlik sükutla yad olunmuşdur.
ADPU-nun rektoru, AMEA-nın müxbir üzvü Yusif Məmmədov bildirmişdir ki, respublikamızda və bir çox xarici ölkələrdə Xocalı soyqırımının iyirminci ildönümünə həsr edilmiş müxtəlif tədbirlər keçirilir. Xocalı faciəsi XX əsrdə ermənilər tərəfindən xalqımıza qarşı törədilmiş növbəti kütləvi qırğın olmaqla bərabər, həm də Azərbaycanın ərazi bütövlüyünə və dövlət müstəqilliyinə qarşı yönəlmiş ənənəvi terror siyasətinin əyani təzahürüdür. Bu soyqırımı bəşəriyyətə və insanlığa qarşı yönəlmiş ən qəddar cinayətlərdən biridir. Beynəlxalq hüququn norma və prinsiplərinə əsla məhəl qoyulmadan həyata keçirilmiş bu soyqırımı aktı xalqımızın azadlıq və müstəqillik istəyini məhv etməyə yönəldilmişdir.
Universitetin türk və Şərqi Avropa xalqları tarixi və tarixin tədrisi metodikası kafedrasının professoru Mais Əhmədov ermənilərin vəhşiliyi nəticəsində bir gecədə Xocalı şəhərinin darmadağın olunduğunu, yüzlərlə günahsız qocaların, qadınların, uşaqların amansızlıqla qətlə yetirildiyini diqqətə çatdırmışdır.
Tələbələrin ifasında şeirlər səsləndirilmişdir.
Sonda Xocalı soyqırımını əks etdirən sənədli film nümayiş olunmuşdur.
Bölmənin digər xəbərləri
