Xocalı faciəsinin 21-ci ildönümünə həsr edilmiş silsilə tədbirlər keçirilmişdir
Bakı, 25 fevral (AZƏRTAC). Azərbaycan Respublikasının insan hüquqları üzrə müvəkkilinin iştirakı ilə Xocalı faciəsinin 21-ci ildönümünə həsr edilmiş silsilə tədbirlər keçirilmişdir.
Ombudsman Aparatının mətbuat xidmətindən AZƏRTAC-a bildirmişlər ki, müvəkkilin uşaq hüquqları üzrə resurs mərkəzi olan Azərbaycan Uşaq və Gənclərin Sülh Şəbəkəsinin liderlik məktəbində təşkil edilmiş tədbirdə Qarabağ müharibəsində həlak olmuş bütün soydaşlarımızın, eyni zamanda, Xocalı faciəsi qurbanlarının xatirəsi bir dəqiqəlik sükutla yad edilmişdir.
Görüşdə yazıçı-jurnalist, Xocalı soyqırımı ilə bağlı bir neçə kitabın müəllifi Səriyyə Müslümqızı, Ombudsman Aparatının əməkdaşları, şəbəkənin üzvləri və valideynlər iştirak etmişlər.
İnsan hüquqları üzrə müvəkkil Elmira Süleymanova çıxış edərək bəşər tarixində insanlığa qarşı ən qatı cinayətlərdən olan Xocalı soyqırımının ildönümünün qeyd olunduğu bu günlərdə istər respublikamızda, istərsə də dünyanın müxtəlif ölkələrində bu faciənin əsl mahiyyətini açan, Ermənistanın soyqırımı və işğalçılıq siyasətini dünyaya tanıdan silsilə tədbirlərin geniş vüsət aldığını bildirmişdir. O, bu tədbirlərin xalqımızın taleyüklü məsələ ilə bağlı nümayiş etdirdiyi böyük həmrəyliyin bariz nümunəsi olduğunu söyləmişdir.
Prezident İlham Əliyevin Azərbaycanın haqq səsinin dünyaya çatdırılmasındakı səylərini qeyd edən Ombudsman, Heydər Əliyev Fondunun prezidenti Mehriban xanım Əliyevanın rəhbərliyi ilə dünyanın 100-dən çox ölkəsində tədbirlərin, Fondun vitse-prezidenti Leyla xanım Əliyevanın təşəbbüsü ilə bir çox ölkələrdə “Xocalıya ədalət!” kampaniyasının həyata keçirildiyini vurğulamışdır.
Qanlı faciənin canlı şahidi S.Müslümqızı ailə üzvlərini, yaxınlarını itirdiyi bu qətliam haqqında danışmış, soyqırımı zamanı adları bəlli olan 613 nəfərin, o cümlədən 106 qadın, 63 uşaq, 70 qocanın həyatına son qoyulduğunu, kütləvi qırğın nəticəsində 8 ailənin bütünlüklə məhv edildiyini, 25 uşağın hər iki valideynindən, 130 uşağın isə valideynlərinin birindən məhrum olunduğunu diqqətə çatdırmışdır. O, mülki əhalinin vəhşiliklə qətlə yetirildiyini, əsir və girov götürülənlərə amansız işgəncələr verildiyini qeyd etmişdir.
Yazıçı-jurnalist bu günlərdə nəşr olunmuş və 1992-ci ilin qanlı fevral gecəsində qətlə yetirilmiş Xocalı uşaqlarına həsr etdiyi “Xocalı uşaqları - Qan içində qar çiçəyi” kitabı barədə də məlumat vermiş, bu yeni əsərini iştirakçılara təqdim etmiş, uşaqların suallarını cavablandırmışdır.
Şəbəkənin üzvləri Xocalı soyqırımına həsr edilmiş səhnəciklər göstərmiş, şeirlər oxumuşlar.
Digər bir tədbir isə Ombudsmanın ahılların resurs mərkəzində “Xocalı soyqırımını Tanıtma” İctimai Birliyinin üzvləri ilə keçirilmişdir. Tədbirdə tarix boyu erməni millətçiləri və onların havadarları tərəfindən Azərbaycan xalqına qarşı qanlı cinayətlər, terror aktları törədildiyi, yüz minlərlə azərbaycanlının kütləvi surətdə qətlə yetirildiyi, Xocalı soyqırımının bunun daha bir nümunəsi olduğu diqqətə çatdırılmışdır.
AMEA-nın Milli Azərbaycan Tarixi Muzeyinin konfrans zalında keçirilən “Xocalı soyqırımı XX əsrin ən dəhşətli cinayətidir” mövzusundakı anma mərasimində Ombudsman Elmira Süleymanova, muzeyin direktoru, akademik Nailə Vəlixanlı Xocalı faciəsinin erməni təcavüzkarlarının Azərbaycan xalqına qarşı yürütdüyü etnik təmizləmə və soyqırımı siyasətinin bir hissəsi olduğunu qeyd etmişlər.
Bundan əlavə, Ombudsman Aparatı paytaxtda və regionlarda, icmalarda, həmçinin QHT-lər, vətəndaş cəmiyyətinin nümayəndələri ilə birgə Xocalı faciəsinin 21-ci ildönümünə həsr edilmiş silsilə tədbirlər keçirmiş, faciə qurbanlarının xatirəsini anmışdır.
Bölmənin digər xəbərləri
