Xocalı faciəsinin şahidi Los-Anceles radiosuna müsahibəsində erməni vəhşiliklərindən danışıb
Vaşinqton, 18 fevral, AZƏRTAC
Azərbaycanın Los-Ancelesdəki baş konsulluğunun təşəbbüsü və təşkilatçılığı, Rabitə və Yüksək Texnologiyalar Nazirliyinin dəstəyi ilə Los-Ancelesdə səfərdə olan Xocalı soyqırımının şahidi Dürdanə Ağayeva “BlogTalkRadio” radiosuna müsahibə verib.
Müsahibə psixoloji müharibə travmaları üzrə tanınmış amerikalı ekspert Daniel Sadiq tərəfindən aparılıb. Proqramın başlanğıcında D.Sadiq bildirib ki, Azərbaycan ərazisinin 20 faizi Ermənistan silahlı qüvvələri tərəfindən işğal olunub və bunun nəticəsində 1 milyondan artıq azərbaycanlı qaçqın və məcburi köçkünə çevrilib. O, bu işğalın mülki azərbaycanlılara qarşı dəhşətli qəddarlıqlarla müşayiət olunduğunu diqqətə çatdırıb və 1992-ci ilin fevral ayında Ermənistan silahlı qüvvələri tərəfindən Xocalı sakinlərinə qarşı qətliamın həyata keçirildiyini qeyd edib.
Xocalı faciəsi zamanı ayağından yaralanaraq 20 yaşında ermənilərə əsir düşmüş Dürdanə Ağayeva müsahibədə əsirlikdə olduğu dövrdə başına gələn hadisələrdən, ermənilərin ona və digər əsirlərə verdikləri ağır işgəncələrdən və törətdikləri vəhşiliklərdən danışıb. O, ermənilərin əsirlikdə olan qadın, uşaq və yaşlı insanlara fərq qoymadan bütün Xocalı sakinlərinə dözülməz işgəncələr etdiyini vurğulayıb.
Yusif Babanlı
AZƏRTAC-ın xüsusi müxbiri
Vaşinqton
Bölmənin digər xəbərləri
