Xocalı soyqırımı bəşəriyyət tarixinə ən dəhşətli kütləvi terror hadisələrindən biri kimi düşmüşdür
Bakı, 25 fevral (AZƏRTAC). Fevralın 25-də “Azərsu” Açıq Səhmdar Cəmiyyətində (ASC) Xocalı faciəsinin 21-ci ildönümü ilə bağlı anma mərasimi keçirilmişdir.
ASC-nin mətbuat xidmətindən AZƏRTAC-a bildirmişlər ki, əvvəlcə faciə qurbanlarının xatirəsi bir dəqiqəlik sükutla yad edilmişdir.
Mərasimdə çıxış edən “Azərsu” ASC sədrinin müavini Mirkamil Seyidov Azərbaycan xalqının tarixində qanlı səhifələrdən biri olan Xocalı soyqırımının bəşəriyyət tarixinə də ən dəhşətli kütləvi terror hadisələrindən biri kimi düşdüyünü qeyd etmişdir.
M.Seyidov faciənin tarixinə nəzər salaraq bildirmişdir ki, 21 il əvvəl, 1992-ci il fevralın 25-dən 26-na keçən gecə bütün beynəlxalq hüquq normalarına zidd olaraq Ermənistan silahlı qüvvələri keçmiş sovet ordusunun Xankəndi şəhərində yerləşən 366-cı motoatıcı alayının iştirakı ilə Xocalı şəhərinə hücum etmiş, bəşəriyyətin ən böyük faciələrindən birini - Xocalı soyqırımını törətmişlər. Bu hərbi təcavüz zamanı Xocalı şəhəri yerlə-yeksan edilmiş, dinc sakinlərə amansızcasına divan tutulmuşdur. Hərbi təcavüz nəticəsində 613 nəfər, o cümlədən qadınlar, uşaqlar, qocalar xüsusi qəddarlıqla qətlə yetirilmiş, cəsədləri üzərində təhqiredici hərəkətlərə yol verilmişdir. Soyqırımı nəticəsində bir neçə ailə bütünlüklə qətlə yetirilmiş, 1275 nəfər girov götürülmüş, yüzlərlə dinc sakin əlil olmuşdur. Girov götürülənlərdən 150 nəfərinin taleyi hələ də məlum deyildir.
Bakı Dövlət Universitetinin dosenti, tarix elmlər namizədi Atamoğlan Məmmədli bildirmişdir ki, Xocalı faciəsi Azərbaycan xalqına qarşı misli görünməmiş kütləvi və amansız qırğın aktı, dövlət müstəqilliyimizə, ərazi bütövlüyümüzə qarşı yönəlmiş irimiqyaslı cinayət idi. O vaxtlar keçmiş Zaqafqaziya hərbi əks-kəşfiyyat bölməsinin rəisi işləmiş Vladimir Sovolyov xatirələrində həmin hadisələr zamanı dinc sakinlərə qarşı xüsusi amansızlıq göstərildiyini, hətta qadınlara, uşaqlara və qocalara rəhm edilmədiyini etiraf etmişdir.
Tarixçi-alim soyqırımının sovet ordusunun 366-cı motoatıcı alayı ilə yanaşı, xaricdən cəlb olunmuş xüsusi təyinatlı terrorçu qruplaşmaların iştirakı ilə törədildiyini diqqətə çatdırmışdır.
Su Təsərrüfatı İşçiləri Həmkarlar İttifaqı Respublika Komitəsinin sədri Akif Məmmədov faciə ilə bağlı konkret faktlara toxunaraq, soyqırımının dünyada tanıdılmasının əhəmiyyətini vurğulamışdır.
Bölmənin digər xəbərləri
