“Xocalı soyqırımı: beynəlxalq hüquq normalarının pozulması kontekstində” mövzusunda tədbir keçirilib
Bakı, 18 fevral, AZƏRTAC
Ombudsmanın Gəncə Regional Mərkəzi və Göygöl Rayon İcra Hakimiyyətinin birgə təşkilatçılığı ilə Göygöldə “Xocalı soyqırımı: beynəlxalq hüquq normalarının pozulması kontekstində” mövzusunda tədbir keçirilib.
Ombudsman Aparatından AZƏRTAC-a bildiriblər ki, tədbirdə Xocalı soyqırımının mahiyyəti barədə iştirakçılara məlumat verilib.
Gəncə Regional Mərkəzinin rəhbəri Səbuhi Abbasov çıxışında bildirib ki, 1992-ci il fevralın 25-dən 26-na keçən gecə erməni silahlı birləşmələrinin vəhşiliyi nəticəsində xocalılılar soyqırımına məruz qalıb. Qeyd edilib ki, Xocalı soyqırımının beynəlxalq cinayət kimi tövsif olunması üçün BMT Baş Məclisinin 1948-ci il 9 dekabr tarixli 260 saylı qətnaməsi ilə qəbul edilmiş Soyqırımı cinayətinin qarşısının alınması və cəzalandırılması haqqında Konvensiya hüquqi əsas rolunu oynamalıdır.
Tədbirdə Azərbaycan həqiqətlərinin dünyaya çatdırılması istiqamətində Ombudsman təsisatının həyata keçirdiyi məqsədyönlü işlərdən danışılıb, insan hüquqları üzrə müvəkkil Elmira Süleymanovanın bu faciə ilə bağlı hər il nüfuzlu beynəlxalq qurumlara, dünya ombudsmanlarına, Azərbaycanın xarici ölkələrdəki və xarici ölkələrin respublikamızdakı səfirliklərinə, Azərbaycanın diaspor təşkilatlarına ünvanlanan bəyanatları iştirakçıların diqqətinə çatdırılıb.
Bölmənin digər xəbərləri
