Xocalı soyqırımının 20-ci ildönümü Təbrizdə böyük kədər hissi ilə qeyd olunmuşdur
Təbriz, 24 fevral (AZƏRTAC). Xocalı soyqırımın iyirminci ildönümü ilə əlaqədar Azərbaycan Respublikasının Təbrizdəki baş konsulluğunda faciə qurbanlarının xatirəsini anma mərasimi keçirilmişdir.
Mərasimdə Türkiyənin Təbrizdəki baş konsulluğunun əməkdaşları, Təbrizdə yaşayan Azərbaycan Respublikasının vətəndaşları, kütləvi informasiya vasitələrinin və şəhər ictimaiyyətinin nümayəndələri iştirak etmişlər. Əvvəlcə Xocalı soyqırımını əks etdirən fotolardan hazırlanmış stend, həmçinin sərgilənən kitab və qəzet materialları ilə tanışlıq olmuşdur.
Xocalı qırğını qurbanlarının xatirəsi bir dəqiqəlik sükutla yad ediləndən sonra mərasimi giriş sözü ilə açan baş konsul Əli Əlizadə Xocalı soyqırımının törədilməsinin səbəbi və acı nəticələri barədə iştirakçıları məlumatlandırmışdır.
Erməni millətçilərinin tarix boyu Azərbaycanda ağır hərbi cinayətlər törətdiklərini diqqətə çatdıran Ə.Əlizadə demişdir ki, xalqımız dəfələrlə xain düşmən tərəfindən etnik təmizlənmə və soyqırımına məruz qalmış, doğma torpaqlarından didərgin salınaraq qaçqın və məcburi köçkün həyatı yaşamağa məhkum edilmişdir.
Keçmiş SSRİ-nin süqutu illərində erməni millətçilərinin yenidən Azərbaycana qarşı ərazi iddiası ilə çıxış etdiklərini bildirən baş konsul demişdir ki, bu əsassız və qanunsuz iddialar Ermənistan-Azərbaycan, Dağlıq Qarabağ münaqişəsinə çevrilmişdir. Nəticədə Azərbaycan xalqının başına XX əsrin ən dəhşətli faciəsi - Xocalı soyqırımı gətirilmiş, işğal olunmuş ərazilərimizdə bir-birindən dəhşətli qətliamlar törədilmiş, minlərlə günahsız insan itkin düşmüş, əsir götürülmüş, mədəniyyət müəssisələri, sosial-məişət obyektləri ilə yanaşı, məscid və qəbiristanlıqlar yerlə-yeksan edilmiş, pirlər və ziyarətgahlar təhqirə məruz qalaraq dağıdılmışdır. Xocalı şəhəri tar-mar edilmiş, bu ərazilərin ən qədin sakinləri olan azərbaycanlılara aid bütün tarixi izlər, milli-mədəniyyət nümunələri bir gecədə məhv edilmişdir.
Ümummilli lider Heydər Əliyevin təşəbbüsü ilə 1994-cü il fevralın 24-də Azərbaycan Respublikasının Milli Məclisi tərəfindən “Xocalı soyqırımı günü haqqında” qərarın qəbul olunduğunu diqqətə çatdıran Ə.Əlizadə bu soyqırımına dair acı həqiqətlərin dünya ictimaiyyətinə çatdırılması istiqamətində görülən işlərdən danışmışdır. Qeyd etmişdir ki, bu faciəyə beynəlxalq səviyyədə ədalətli siyasi-hüquqi qiymətin verilməsi istiqamətində Azərbaycan tərəfi bundan sonra da səylərini davam etdirəcəkdir. Lakin bu faciənin beynəlxalq səviyyədə siyasi-hüquqi qiymət alması üçün ilk olaraq Azərbaycana dost və qonşu ölkələr tərəfindən dəstək verilməsi xüsusi əhəmiyyət daşıyır.
Baş konsul bildirmişdir ki, erməni millətçi dairələri XX əsrin əvvəllərində Azərbaycan ilə yanaşı, qardaş Türkiyədə, Şərqi Anadoluda, eləcə də İranın Xoy, Maku, Səlmas və digər şəhərlərində də günahsız insanlara qarşı dəhşətli hərbi cinayətlər törətmişlər. Bütün bu tarixi gerçəkliklərin olduğu kimi dünya ictimaiyyətinə çatdırılması zəruri və vacib işlərdəndir.
Mərasimdə Türkiyənin Təbrizdəki baş konsulu da çıxış edərək səslənən fikirlərə qoşulduğunu bildirmişdir. O, Xocalı soyqırımının bütün bəşəriyyət üçün qanlı faciə olduğunu bildirmiş, Azərbaycan xalqının kədərini anladıqlarını söyləmiş və faciənin qurbanlarına rəhmət diləmişdir.
Azərbaycana qarşı davam edən erməni təcavüzünün tarixi gerçəkliklərindən və Xocalı soyqırımının dəhşətlərindən bəhs edən film nümayiş etdirilmiş və faciənin qurbanlarının xatirəsinə ehsan verilmişdir.
Xocalı faciəsindən bəhs edən DVD filmlər, Xocalı əhalisinin dünya ictimaiyyətinə ünvanlanmış müraciəti və fars dilinə tərcümə edilmiş digər əyani materiallar mərasim iştirakçılarına paylanmışdır.
Sabir Şahtaxtı
AZƏRTAC-ın xüsusi müxbiri
Təbriz
Bölmənin digər xəbərləri
