“Xocalını yaşadanlar” adlı tədbirdə uşaqlara soyqırımı haqqında ətraflı məlumat veriləcəkdir
Bakı, 23 fevral (AZƏRTAC). Fevralın 25-də Azərbaycan Xalçası və Xalq Tətbiqi Sənəti Dövlət Muzeyində Xocalı faciəsinin 20-ci ildönümünə həsr olunmuş “Xocalını yaşadanlar” adlı tədbir keçiriləcəkdir.
Mədəniyyət və Turizm Nazirliyindən AZƏRTAC-a bildirmişlər ki, tədbirin məqsədi gələcəyimiz olan uşaqlara 20 il bundan əvvəl ermənilərin Xocalıda törətdikləri soyqırımı haqqında ətraflı məlumat verməkdir.
Tədbirdə Nizami Rayon Mədəniyyət Mərkəzinin fəal üzvlərinin, Sabunçu rayonunun Bakıxanov qəsəbəsindəki 309 nömrəli orta məktəbin və Bakı şəhərində yerləşən 2 nömrəli Füzuli məcburi köçkün məktəbinin şagirdlərinin ifasında Xocalıya həsr edilmiş kompozisiyalar, vətənpərvərlik ruhunda müxtəlif şeirlər təqdim olunacaqdır. Eyni zamanda rəssamlıq bacarığı olan uşaqlar Xocalı soyqırımı ilə bağlı duyğu və hisslərini çəkəcəkləri şəkillərdə əks etdirəcəklər.
Tədbirin sonunda iştirakçılar muzeyin ekspozisiyası ilə tanış olacaqlar.
Bölmənin digər xəbərləri
