XOCAVƏND RAYON İCRA HAKİMİYYƏTİNİN BAŞÇISI EYVAZ HÜSEYNOVUN ÇIXIŞI
-Möhtərəm cənab Prezident!
Ölkəmizin ərazi bütövlüyünün bərpa edilməsi, düşmən tapdağı altında olan müqəddəs Qarabağın işğaldan azad olunması, doğma yurd-yuvalarından didərgin düşmüş qaçqın və məcburi köçkünlərin problemlərinin həlli ümummilli liderimiz Heydər Əliyevin daim diqqət mərkəzində olmuş və bunu ölkənin bir nömrəli problemi elan etmişdi.
1993-cü ilin sonunda ulu öndərin cəbhə xəttində yaranmış vəziyyətlə bağlı xalqa müraciəti və döyüş bölgəsinə gəlməsi ilə orduda böyük ruh yüksəkliyi yarandı və rayonun tamamilə işğal olunmuş ərazisinin 14 min hektarı işğaldan azad edildi. 1994-cü ilin aprel ayında ulu öndər ön cəbhədə əsgərlərin qonağı oldu.
Hazırda Xocavənd rayonu ərazisinin 14 min hektarı bizim istifadəmizdədir. Bu gün rayon əhalisinin xeyli hissəsi burada və “Haramı” adlanan qış yataqlarında məskunlaşmışdır. Ötən illər ərzində burada qəsəbələr salınmış və bir çox vacib problemlər həllini tapmışdır. Əhalinin məşğulluğunu təmin etmək məqsədi ilə onlara torpaq sahələri ayrılmış, fermer təsərrüfatları yaradılmış, kənd təsərrüfatı məhsullarının istehsalında xeyli irəliləyiş olmuşdur.
Yeni Xocavənd və Yeni Tuğ qəsəbələrində şoranlaşmanın qarşısının alınması məqsədi ilə 7,1 kilometr uzunluğunda drenaj kanalı çəkilmiş, “Aqroservis” xidmətinin yaradılması haqqında qaldırılmış məsələ də öz həllini tapmış, Yeni Xocavənd qəsəbəsində subartezian quyusu qazılmış və burada daxili yolların, Yeni Tuğ qəsəbəsində daxili elektrik xətlərinin təmiri başa çatdırılmış və bir çox digər problemlər öz həllini tapmışdır.
Görülmüş işlərlə bərabər, bəzi məsələlərin həllinə ehtiyac vardır. Gələcəkdə Xocavənd rayonunun strateji əhəmiyyət daşıyan ərazisində 200 ailəlik qəsəbənin salınmasına, əhalinin məşğulluğunu təmin etmək və kənd təsərrüfatı məhsullarının istehsalını artırmaq məqsədi ilə artezian quyularının qazılmasına, Yeni Tuğ qəsəbəsində məskunlaşan əhalinin yaşadığı çiy kərpic evlərin daş evlərlə əvəz olunmasına, rayonun “Qarasu” və “Nərgiztəpə” adlanan ərazilərini birləşdirəcək çınqıl yolun çəkilməsinə ehtiyac vardır.
İşsizliyin aradan qaldırılması və məşğulluğun təmin olunması məqsədi ilə heyvandarlıq, taxılçılıq, tərəvəzçilik və üzümçülüyün inkişaf etdirilməsi və əhalinin sıx məskunlaşdığı ərazilərdə kiçik emal müəssisələrinin, toxuculuq və tikiş sexlərinin yaradılması ümumi inkişafa xidmət etmiş olardı.
Dövlət Proqramına uyğun olaraq yaxın vaxtlarda Beyləqan rayonu ərazisində Xocavənd rayonundan olan məcburi köçkünlər üçün 500 ailəlik qəsəbənin tikintisinə başlanılacaqdır. Yeni salınacaq qəsəbədə yerli dövlət orqanları üçün inzibati binaların tikilməsi də olduqca vacibdir.
Möhtərəm cənab Prezident!
Bütün xocavəndli məcburi köçkünlərin ümumi fikrini ifadə edərək bildirirəm ki, xocavəndlilər ulu öndərimizin ideyalarına və onun siyasi xəttinin layiqli davamçısı olan Sizə həmişə sadiqdirlər. Sizin yeritdiyiniz daxili və xarici siyasəti dəstəkləyir və müdafiə edirlər. İşğal altında qalan torpaqlarımızın beynəlxalq hüquq norma və prinsipləri əsasında azad edilməsi istiqamətində apardığınız uğurlu siyasətin nəticəsində artıq aparıcı dünya dövlətləri və nüfuzlu beynəlxalq təşkilatlar Ermənistanı işğalçı dövlət kimi tanıyırlar.
Cənab Ali Baş Komandan, dəfələrlə çıxışlarınızda qeyd etmisiniz ki, biz torpaqlarımızın itirilməsi ilə heç vaxt barışa bilmərik. Dağlıq Qarabağın Azərbaycandan ayrılmasına heç vaxt yol verilməyəcək və bu, danışıqlar mövzusu deyildir. Dağlıq Qarabağ işğalçılardan azad olunacaq, orada yaşayan azərbaycanlılar öz doğma torpaqlarına qayıdacaqlar.
Əmin ola bilərsiniz ki, hər bir xocavəndli işğal olunmuş torpaqlarımızın azad edilməsi uğrunda Sizin əmrinizlə döyüşə atılmağa hazırdır. Xocavəndlilər inanırlar ki, Sizin apardığınız uğurlu siyasət nəticəsində torpaqlarımız düşmən tapdağından azad ediləcək, bütün məcburi köçkünlər kimi biz də öz doğma yurdlarımıza qayıdacaq və Siz də Xocavənddə xocavəndlilərin qonağı olacaqsınız.
Diqqətinizə görə sağ olun.
Bölmənin digər xəbərləri
