Xüsusi karantin rejimi ilə əlaqədar Gəncədə ərzaq satışı məntəqələrində monitorinqlər keçirilib
Bakı, 15 aprel, AZƏRTAC
Ölkəmizdə koronavirusa qarşı həyata keçirilən mübarizə tədbirləri çərçivəsində tətbiq olunmuş xüsusi karantin rejimi ilə əlaqədar Qida Təhlükəsizliyi Agentliyinin əməkdaşları qida sahəsində fəaliyyət göstərən sahibkarlıq subyektlərinin, ərzaq məhsullarının satışı məntəqələrində xüsusi karantin rejiminə, eləcə də agentliyin bu sahədə hazırladığı metodiki göstərişlərə əməl olunması ilə bağlı monitorinqlər keçirirlər.
Agentliyin İnformasiya təminatı və innovativ həllər şöbəsindən AZƏRTAC-a verilən məlumata görə, Gəncə şəhərində fəaliyyət göstərən ərzaq məhsullarının satışı məntəqələrində növbəti monitorinqlər zamanı qida məhsullarının satışı ilə məşğul olan sahibkarlıq subyektlərinə termiki emal olunmadan və xüsusi təmizlənmədən keçmədən istifadə olunan qida məhsullarının uyğun yerlərdə saxlanılması, həmin məhsulların alıcılara xüsusi geyimli market əməkdaşları tərəfindən təqdim edilməsi ilə bağlı tövsiyələr verilib. Agentliyin əməkdaşları tərəfindən hazırlanmış təşviqat xarakterli çap materialları ərzaq satışı məntəqələrində quraşdırılıb.
Maarifləndirmə tədbirləri çərçivəsində indiyədək bu sahədə bir neçə metodiki göstəriş hazırlanaraq respublikamızın bütün bölgələrində, eləcə də Gəncə şəhərində fəaliyyət göstərən müvafiq sahibkarlıq subyektlərinə rəsmi şəkildə təqdim olunub.
Agentlik bir daha vətəndaşları ərzaq məhsullarının satışı obyektlərində tətbiq olunmuş koronavirusla bağlı xüsusi rejimə əməl etməyə, virusdan qorunmaq üçün tələb olunan metodiki göstərişlərdə nəzərdə tutulmuş qaydalara ciddi şəkildə riayət etməyə çağırır.
Bölmənin digər xəbərləri
