YANVAR-İYUL AYLARINDA SƏNAYE MƏHSULUNUN VƏ XİDMƏTLƏRİN HƏCMİ 14,1 FAİZ ARTMIŞDIR
Dövlət Statistika Komitəsindən AZƏRTAC-a bildirmişlər ki, 2008-ci ilin ilk yeddi ayında sənaye məhsulunun və xidmətlərinin həcmi 14,1 faiz artmış və 18,6 milyard manat təşkil etmişdir.
Sənayenin artımı neftin hasilatında 14,8 faiz, qazın hasilatında 68,6 faiz, qida məhsullarının istehsalında 1,1 faiz, kimya sənayesində 57,8 faiz, dəri, dəridən məmulatlar və ayaqqabı istehsalında 38 faiz, metallurgiya sənayesi və hazır metal məmulatların istehsalında 72,9 faiz, oduncaqların emalı və ağacdan məmulatların istehsalında 1,4 faiz, elektrik avadanlığı, optik və elektron avadanlıq istehsalında 18,7 faiz olmuşdur.
Yeddi ayda ölkədə 28,8 milyon ton neft, 9,1 milyard kubmetr əmtəəlik qaz hasil edilmişdir. Ötən ilin müvafiq dövrü ilə müqayisədə neft sektorunda istehsalın həcmi 15,1 faiz, qeyri-neft sektorunda isə 8,3 faiz çox olmuşdur.
İstehsalın 95 faizi malların, 5 faizi isə sənaye xarakterli xidmətlərin payına düşmüş, sənaye məhsulunun 17,9 faizi dövlət müəssisələrində, 82,1 faizi isə özəl bölmədə istehsal edilmişdir.
Bölmənin digər xəbərləri
