Yaponiyada qulluqçuların qalstuk və pencəkdən imtina etməsinə icazə verən “Coolbiz” fəsli başlayıb
Tokio, 1 may, AZƏRTAC
Yaponiyada hər il mayın 1-dən keçirilən ümummilli “Coolbiz” fəsli başlayıb. Həmin gündən etibarən ölkədəki bütün qulluqçulara iş yerinə pencəksiz və qalstuksuz gəlmək icazəsi verilir, dövlət müəssisələrindəki kondisionerlər isə müsbət 28 dərəcə göstəriciyə qoyulur.
AZƏRTAC xəbər verir ki, “Coolbiz” kampaniyasının məqsədi ölkədə elektrik enerjisindən istifadəni azaltmaqdır. İyunun 1-dən başlayaraq həmin fəsil “Super coolbiz” adlanan ikinci mərhələyə qədəm qoyacaq ki, bu da yapon qulluqçulara tam sərbəst geyimdə, hətta cins şalvar, futbolka və ya şalvarın üstündən salınan qısaqol köynəkdə işə gəlməyə icazə verəcək. Həmin vaxt hökumət üzvləri, əsasən yüngül şalvar və ölkənin cənubunda daha çox yayılmış “karuyuşi” adlanan güllü pambıq köynəklər geyinirlər.
Yaponiyada ümummilli yay geyiminə keçilməsi təcrübəsi 2005-ci ildən tətbiq edilir. Xüsusən 2011-ci ilin martında “Fukusima-1” atom elektrik stansiyasında baş verən qəzadan sonra yaşanan enerji böhranı bu kampaniyanın əhəmiyyətini daha da artırıb.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
