Yardımlıda 1755 hektar sahədə yazlıq bitkilər əkilib
Yardımlı, 11 iyun, Bağır Əliyev, AZƏRTAC
Yardımlı rayonunda yazlıq bitkilərin əkin sahələrində işlər başa çatmaq üzrədir. Əkin kampaniyasına vaxtında və mütəşəkkil başlayan kənd təsərrüfatı məhsulları istehsalçıları verilən subsidiyalardan faydalanaraq 1755,8 hektar sahədə müxtəlif növ bitkilər əkiblər.
Bu barədə AZƏRTAC-ın bölgə müxbirinə Yardımlı Rayon Statistika İdarəsinin rəisi Aydın Ağayev məlumat verib.
Bildirilib ki, rayonda yazlıq əkin aparılmış sahələrdən 889,7 hektarını kartof, 645,5 hektarını dənli və dənli paxlalılar, 187,6 hektarını müxtəlif növ tərəvəz məhsulları, 30 hektarını tütün, 3 hektarını isə bir illik ot sahəsi təşkil edir.
Yardımlının əkin relyefinə uyğun olaraq əvvəlki illərə nisbətən rayonda kartof əkininə daha geniş yer verilib.
Hazırda rayonda tərəvəz sahəsində yazlıq əkin işləri davam etməklə yanaşı, rayonun nisbətən dağətəyi hissəsində taxıl biçininə hazırlıq işləri görülür.
Bölmənin digər xəbərləri
