YAZIÇI-PUBLİSİST ELMİRA AXUNDOVANIN ÇIXIŞI
Mən çıxışa hazırlaşmamışam. Çünki belə bir təqdimat mərasiminin olmasını bu gün bilmişəm. Amma bir neçə kəlmə demək istəyirəm.
Son bir neçə ildə biz Heydər Əliyev haqqında çox kitablar görmüşük, oxumuşuq. Bilirsiniz, hərdən bəzi kitablar narazılıq hissi doğurur. Ona görə ki, bəzən görürsən, şit təriflərdən, səthi yazılardan başqa bir şey deyildir. Digər tərəfdən, hərdən kitabın müəllifləri də, orada olan familiyalar da narazılıq hissi doğurur. Ona görə ki, onların bu şəxsiyyət haqqında yazmağa mənəvi haqları yoxdur. Bu baxımdan mənim üçün çox əlamətdar haldır ki, bu kitabı iki müəllif – Ramiz Mehdiyev və mənim dostum, həmkarım Aslan Aslanov yaradıblar. Çünki bu adamlar Heydər Əliyevin komandasının üzvləri idilər. Onunla uzun illər işləyib, onun siyasətini həyata keçirən adamlardır. Onların belə kitablar yazmağa, yaratmağa tam mənəvi haqları var. Mən çox şadam ki, bu kitabda onların imzalarıdır.
Bir jurnalist kimi, mənim üçün çox sevindirici hal başqa bir cəhətdədir. Çox vaxt jurnalistlərin yazılarından, oçerklərindən, fotoşəkillərindən kitablarda istifadə edirlər, adları heç yerdə getmir. Baxın, burada Heydər Əliyevin şəxsi fotoqrafı, bizim dostumuz Rafiq Bağırov əyləşibdir. Bilirsiniz, son bir neçə ildə, bəlkə də, onlarca kitab çıxıb və bu kitablar onun gözəl şəkilləri üzərində qurulubdur. Amma həmin kitablarda onun adı yoxdur. Bilmirəm, bu etinasızlıqdan, peşəyə hörmətsizlikdənmi irəli gəlir?! Fotoqraf Oqtay Aydınoğlu da həmçinin. Amma bu kitabın yaxşı və sevindirici cəhətlərindən biri də odur ki, burada müəlliflər peşəmizə çox hörmətlə yanaşırlar. Fotoşəkillərin müəlliflərinin adları verilir, hətta görkəmli siyasətçilər barədə xaricdə müsahibə götürən müxbirlərin də adları verilmişdir. Bu, çox sevindirici və əlamətdar haldır. Mən istərdim, bizə lazım olan bu kitab mütləq rus, ingilis, fransız dillərində də çap edilsin.
Mən çox böyük minnətdarlıq hissi ilə deyirəm ki, Ramiz müəllim, çox sağ olun, Aslan müəllim çox sağ olun. Çox sağ olun ki, belə kitabı yazmısınız. Ramiz müəllimin kitabdakı oçerki mənim üçün Heydər Əliyevin yeganə və birinci, dolğun, obyektiv siyasi tərcümeyi-halıdır. Mən belə tərcümeyi-hala indiyidək rast gəlməmişəm. Mən ondan mütləq istifadə edəcəyəm. Ona görə ki, bir kitab üzərində işləyirəm və bu, mənim üçün dəyərli informasiya mənbəyi olacaqdır.
Diqqətinizə görə çox sağ olun!
X X X
KAMAL ABDULLAYEV: Mən elə bilirəm ki, çıxış edənlər bu kitabın məziyyətlərini hərtərəfli dedilər. Bundan başqa, kitab göz qabağındadır. Burada bizim görkəmli ziyalılarımız, rektorlarımız əyləşiblər. Onlarla söhbət zamanı biz eyni fikrə gəldik ki, bu kitab bizim ali məktəblərimizə yol açmalıdır. Doğrudan da, burada müəllimlərimiz, tələbələrimiz üçün külli miqdarda gözəl, lazımlı informasiya vardır.
“Dünyanı heyran qoyan insan”. Mən bir dilçi kimi, bu adın əhəmiyyətini qeyd etmək istəyirəm. Heyrətə salan olsaydı, heyrətə salıb bununla da məsələni bitirmək olar. Amma dünyanı heyran qoyan insan indiyə qədər dünyanı heyrətdə saxlayır. Məsələ bundadır, bu prosesi bitirmək mümkün deyildir. Bu proses - dünyanı heyranlıqda saxlamaq prosesi bu gün də, sabah da davam edəcəkdir. Elə bu gözəl və uğurlu tapılmış ad gələcəkdə bu nəşrin dolğunlaşmasına, yeni-yeni nəşrlərə, başqa-başqa dillərə tərcüməsinə gətirib çıxaracaqdır.
Deyildiyi kimi, bu kitabda bir çox dövlət xadimlərinin ürək sözləri yazılıbdır. Mən məşhur bir incəsənət xadiminin bir sözünü sitat gətirmək istəyirəm. Bu insan dünyada olan Prezidentlərlə dostluğu ilə seçilir. Dünyanın sülh qaranquşlarından biridir. Məşhur İspaniya müğənnisi Xulio İqlesias bizim Prezidentimiz haqqında belə deyir : “Sizin gözəl, hər şeyi görən gözləriniz vardır. Cənab Prezident, bilirsinizmi, əgər Prezidentin gözləri gözəl olmasa, onun üçün çox çətin olar. İnsanlar həmişə insanı gözündən oxuyurlar”.
Doğrudan da, göz ürəyin aynasıdır. Prezidentimizin bizə baxan gözləri, onun işığı bu gün də bizimlədir.
Mən kitabın müəlliflərinə, bu kitabı ərsəyə gətirib çatdıran hər bir insana burada əyləşənlərin adından dərin təşəkkürümüzü bildirirəm. İnanıram ki, bu kitab bundan sonra da öz həyatını yaşayacaqdır. Ramiz müəllim, sizə, Aslan müəllim, sizə və sizin böyük kollektivinizə dərin minnətdarlıq hissilə çox sağ olun, deyirəm. İcazənizlə, bununla da təqdimat mərasimini bitmiş hesab edək. Təşəkkür edirəm.
X X X
Mərasimdə Milli Məclisin sədri Murtuz Ələsgərov, Prezident Administrasiyasının rəhbəri Ramiz Mehdiyev, parlament sədrinin birinci müavini Arif Rəhimzadə, deputatlar, tanınmış ziyalılar elm, mədəniyyət, incəsənət xadimləri iştirak edirdilər.
Bölmənin digər xəbərləri
