YENİ AZƏRBAYCAN PARTİYASININ İCRAÇI KATİBİ, MİLLİ MƏCLİSİN DEPUTATI ƏLİ ƏHMƏDOVUN ÇIXIŞI
Hörmətli xanımlar və cənablar!
Azərbaycan xalqının ümummilli lideri, Yeni Azərbaycan Partiyasının yaradıcısı və əbədi lideri Heydər Əliyev haqqında söz demək, şərəfli olduğu qədər də məsuliyyətlidir. Lakin Heydər Əliyev haqqında kitab yazmaq daha şərəfli və daha da məsuliyyətlidir. Bu gün bizə və bizim vasitəmizlə Azərbaycan ictimaiyyətinə təqdim edilən “Azərbaycanın qurtuluş tarixi” və “Böyük Xilaskar” kitabları ilə tanış olduqdan sonra belə fikir yaranır ki, həm müəllif, həm də kitabların işıq üzü görməsində böyük əmək sərf etmiş hər bir hörmətli insan qarşılarına qoyduqları məqsədə nail olublar, Azərbaycan xalqının ümummilli lideri Heydər Əliyevin adına, şəxsiyyətinin böyüklüyünə, Azərbaycan xalqı qarşısında xidmətlərinin miqyasına layiq olan gözəl, nəfis şəkildə tərtib olunmuş kitabları hazırlayıb Azərbaycan oxucularına təqdim ediblər.
Tarix xalqın tərcümeyi-halıdır. Hər bir insan öz tərcümeyi-halı ilə tanındığı kimi, xalqı da onun tarixinə görə tanıyırlar. Xalqı tarixinə görə qiymətləndirirlər, ona tarixinə görə hörmət edirlər. Bu gün burada deyildiyi kimi, tarixin yaradıcıları böyük şəxsiyyətlərdir, dahi insanlardır. Bu fikrin bir daha təsdiqi özünü onda göstərir ki, Azərbaycanın müasir tarixinin yaradıcısı, Azərbaycan xalqının dahi oğlu Heydər Əliyev olmuşdur.
Xalqlar öz istəklərini, duyğularını, düşüncələrini və arzularını formalaşdırıb yetişdirdikləri tarixi şəxsiyyətlər vasitəsilə reallaşdırırlar, bu da xalqın tarixinin yaranması prosesini özündə əks etdirir. Azərbaycan xalqı ətalətdən əziyyət çəkərək, inkişafa böyük ehtiyac duyduğu bir zamanda Heydər Əliyev bu tarixi missiyanı öz qüdrətli çiyinlərinə götürərək Azərbaycanın inkişafının, yüksəlişinin, quruculuğunun tarixini yaratdı və Azərbaycan tarixinə qurucu lider kimi daxil oldu.
Azərbaycan xalqı müstəqilliyinin ilk illərində daxili didişmələrdən və xarici təhlükələrdən əziyyət çəkdiyi bir dövrdə Heydər Əliyev xilaskarlıq missiyasını öz üzərinə götürərək, Azərbaycanın qurtuluş tarixini yaratdı. Azərbaycan xalqı birliyə, həmrəyliyə ehtiyac duyduğu bir zamanda Heydər Əliyev bu missiyanı da öz üzərinə götürərək, Azərbaycanın milli birliyini təmin etdi və bunun sayəsində xalqının ümummilli lideri adını qazandı. Nəhayət, Azərbaycan xalqı özünün müstəqil dövlətçiliyini, müstəqil dövlətini yaratmaq vəzifəsi ilə üz-üzə qalan zaman Heydər Əliyev bu vəzifəni də, bu missiyanı da özünün qüdrətli çiyinlərinə götürərək müstəqil, müasir Azərbaycanı və onun şərəfli tarixini yaratdı.
Qurtuluş Azərbaycanın Heydər Əliyev tərəfindən yaradılan tarixinin şərəfli bir səhifəsidir. Sözün həqiqi mənasında, qurtuluş Heydər Əliyevin xilaskarlıq missiyasının təntənəsidir. Qurtuluş Azərbaycanın müstəqil, müasir dövlətçiliyinin yaranmasının fundamental əsasıdır. Məhz, bu tarixi missiyaları yerinə yetirməklə Heydər Əliyev Azərbaycan tarixinin bütövlükdə mənzərəsini yaradıbdır. Bu mənada biz deyə bilərik ki, müasir Azərbaycan tarixi Heydər Əliyevin özüdür, Heydər Əliyevin fəaliyyətində, Heydər Əliyevin titanik səylərində özünün təsdiqini tapır.
Mən belə düşünürəm ki, hər bir tarixi şəxsiyyətə həqiqi qiymət vermək səlahiyyəti xalqa və zamana muxsusdur. Azərbaycan xalqı Heydər Əliyevin millət, Azərbaycan dövlətçiliyi qarşısında göstərdiyi böyük xidmətlərə öz qiymətini veribdir. Bu qiymət xalq tərəfindən Heydər Əliyevin ümummilli lider adlandırılmasında öz təsdiqini tapıbdır. Düşünürəm ki, tarix də xalqımızın Heydər Əliyevin xidmətlərinə verdiyi qiyməti təsdiqləyəcək və ona özünün əzəmətli, möhtəşəm və heç zaman silinməyən möhürünü qoyacaqdır. Azərbaycan xalqının gələcək nəsilləri Heydər Əliyev şəxsiyyətində özünün iftixar mənbəyini görəcək və bundan qürur duyacaqdır.
Tarixi şəxsiyyətlərin fəaliyyətinin miqyasını qiymətləndirən bir amili də qeyd etmək istərdim. Tarixi şəxsiyyətlərin göstərdiyi xidmətin həqiqi mahiyyəti və dəyəri öz ifadəsini onda tapır ki, onun müəyyənləşdirdiyi siyasət, qoyduğu yol həmin şəxsiyyətin özündən sonra da davam etdirilir. Bu gün mən xüsusi qürur hissi ilə demək istəyirəm ki, Heydər Əliyevin müəyyənləşdirdiyi siyasəti və yolu Azərbaycan xalqı uca tutur və ardıcıl surətdə həyata keçirir. Sevindirici hal ondan ibarətdir ki, Heydər Əliyevin siyasətini, müəyyənləşdirdiyi yolu onun ən layiqli davamçısı, Azərbaycan Prezidenti hörmətli İlham Əliyev həyata keçirir. İnanırıq və bu bizim qəti əqidəmizdir ki, Heydər Əliyevin yolu ilə irəliləyən Azərbaycan xalqı həmişə uğurlar qazanacaqdır. Bu yol həmişə Azərbaycan xalqını irəliyə aparacaq, xoşbəxtliyə gətirib çıxaracaq və bu yolla irəliləyən xalqımız həyatın bütün sahələrində yüksək zirvələrə çatacaqdır.
Həmişə olduğu kimi, bu zirvənin ən uca nöqtəsində dayanan ümummilli liderimiz Heydər Əliyevin obrazı daim, onilliklər, yüzilliklər boyu Azərbaycan xalqının gələcək nəsillərinin yoluna işıq saçacaqdır. Mən Heydər Əliyev yoluna dərindən sədaqətli olan hər bir Azərbaycan vətəndaşına, hər bir azərbaycanlıya, hər bir insana öz dərin hörmət və ehtiramımı bildirirəm.
Bölmənin digər xəbərləri
