“YENİ BAKI VƏ VYANA” AVSTRİYA-AZƏRBAYCAN CƏMİYYƏTİ XƏSTƏ UŞAQLARA KÖMƏK BEYNƏLXALQ FONDU YARATMIŞDIR
Cəmiyyətin prezidenti Neda Berger təşkilatın 2000-ci il iyunun 14-də Prezident Heydər Əliyevin Avstriyaya ilk rəsmi səfəri ərəfəsində yaradıldığını söyləmiş və görülmüş işlər haqqında qısa məlumat vermişdir. Bildirilmişdir ki, bu illər ərzində Azərbaycanda Daun xəstəliyi sindromlu uşaqlara yaxından kömək edən cəmiyyət, hazırda Bakıda “Sabahınız xeyir, uşaqlar!” Beynəlxalq Fondunu yaratmışdır. Təkcə respublikamızda deyil, digər ölkə və regionlardakı xəstə uşaqlara da daim kömək edəcək fondun məqsədi onların mənəvi və fiziki vəziyyətinin, iş qabiliyyətinin yaxşılaşdırılmasıdır. Fondun açılışı ilə əlaqədar aprelin 4-də Müslüm Maqomayev adına Azərbaycan Dövlət Filarmoniyasında avstriyalı dirijor Volfqanq Harerin rəhbərliyi ilə Qara Qarayev adına Dövlət kamera orkestrinin ifasında Qərbi Avropa və Azərbaycan bəstəkarlarının əsərlərinin səslənəcəyi qeyd edilmiş, bu işdə Rabitə və İnformasiya Texnologiyaları Nazirliyinin köməyi diqqətə çarpdırılmışdır.
Volfqanq Harer, həmçinin cəmiyyətin idarə heyətinin üzvü, “Şülke və Mayr” şirkətinin direktoru, d-r Haynts Yelinek Bakıda olduqlarından məmnunluqlarını bildirmiş, iştirakçıları konsertə dəvət etmişlər.
Tədbirdə tanınmış avstriyalı həkim və biokimyaçı, professor Yorq Birkmayer “ENADA”, “ENADALert” preparatları haqqında məlumat vermişdir. Bildirilmişdir ki, dünyanın müxtəlif ölkələrində sınaqdan çıxmış, natural qida əlavəsi olan bu preparatlar Daun xəstəliyi sindromlu uşaqların beyin fəaliyyətinə müsbət təsir göstərir və onların normal həyat tərzi keçirməsinə, adi məktəbdə oxumasına kömək edir və o, Neda Bergerin xahişi ilə bu preparatları Bakıdakı xəstə uşaqlara pulsuz təqdim etmişdir. Tədbirdə professor Y.Birkmayerin Vyanadakı laboratoriyası və aparılan təcrübələr barədə qısa film göstərilmişdir.
Sonda KİV nümayəndələrinin sualları cavablandırılmışdır.
Bölmənin digər xəbərləri
