YER KÜRƏSİ YENƏ DƏ MAQNİT QASIRĞASI İLƏ ÜZLƏŞƏCƏKDİR
Bəs nə üçün son vaxtlar maqnit qasırğaları mütəmadi xarakter almışdır? Məsələ bundadır ki, indi bəşəriyyət son 60-65 il ərzində Günəşin daha böyük fəallığı dövrünü yaşayır. Burada qorxulu heç nə yoxdur -Günəşdə baş verənlərin qlobal istiləşmə ilə heç bir əlaqəsi yoxdur. Bu hadisələr tsikllə baş verir. Günəşin onilliklərlə davam edən “böyük” tsiklləri ilə yanaşı, 11 il davam edən və ümumən, yüksək fəallıq fonunda qasırğaların daha çox, yaxud daha az olması ilə səciyyələnən “kiçik” tsiklləri də var. İndi Günəş öz fəallığının müəyyən qədər azalması dövrünü yaşayır. Doğrudur, indiki Günəş fəallığının azalması, tutaq ki, 60 il bundan əvvəl fəallığın artdığı dövrdəkindən daha çoxsaylı maqnit qasırğaları ilə müşayiət olunur.
Alimlərin fikrincə, son aylar Günəş ötənilki yayla müqayisədə özünü xeyli sakit aparıb. O, yalnız iyulun axırlarında “coşmuş”, ən çox nəzərəçarpan geomaqnit fəallığı həmin ayın 25-də və 27-də müşahidə edilmişdir.
