Yetmişdən çox şəhidin xatirəsini əbədiləşdirən gəncəli heykəltaraş VİDEO
Gəncə, 20 dekabr, Elcan Məmmədov, AZƏRTAC
Gəncədə yaşayan Qasım Qasımov 40 ildən çoxdur ki, heykəltaraşlıq sənəti ilə məşğuldur. O, Birinci Qarabağ müharibəsindən bu yana şəhidlərin xatirəsini təmənnasız əbədiləşdirməyi özünə borc bilib. İndiyədək 70-dən çox şəhidin kiçik büstlərinin və barelyeflərinin müəllifidir.
AZƏRTAC-ın bölgə müxbiri heykəltaraşın kiçik emalatxanasında hazırladığı onunla həmsöhbət olub.
Qasım Qasımov 1980-1984-cü illərdə Gəncə şəhər Uşaq Rəssamlıq Məktəbini bitirib. 1984-1988-ci illərdə Əzim Əzimzadə adına Azərbaycan Dövlət Rəssamlıq Texnikumunda Heykəltaraşlıq fakültəsində təhsilini başa vurub. O, 1988-ci ildən Gəncə şəhər Uşaq Rəssamlıq Məktəbində dərs deyir. 2011-ci ildən isə Azərbaycan Rəssamlar İttifaqının üzvüdür.
Sənətkar şəhidlərin büstlərini hazırlayarkən onların hər birinin döyüş yolunu və həyat hekayəsini də yaxından öyrənməyə çalışdığını deyib: “Hansısa bir şəhidin heykəlini düzəltməmişdən əvvəl onun müharibədə keçdiyi yolu mütləq mütaliə edirəm. Onları canlandırmaq üçün birinci gözlərində olan əzəmət, şəhidlik ruhu məni cəlb edir”.
Heykəltaraş 30 ilə yaxındır ki, təmənnasız olaraq şəhidlərin heykəllərini düzəldir. Onun hazırladığı əsərlər arasında müxtəlif tarixi şəxsiyyətlərin büst və heykəlləri də var. Hazırda yunan mifologiyası qəhrəmanlarının heykəllərini hazırlayır. Ən böyük arzusu isə Şuşada qəhrəman Azərbaycan əsgəri üçün qeyri-adi formada abidə ucaltmaqdır.
Bölmənin digər xəbərləri
