“Yol hərəkəti qaydaları uşaqların gözü ilə” adlı rəsm müsabiqəsinin nəticələri açıqlanıb
Bakı, 11 oktyabr, AZƏRTAC
Baş Dövlət Yol Polisi İdarəsinin elan etdiyi “Yol hərəkəti qaydaları uşaqların gözü ilə” adlı rəsm müsabiqəsinə yekun vurulub.
Bu barədə AZƏRTAC-a Daxili İşlər Nazirliyinin mətbuat xidmətindən məlumat verilib.
Bildirilib ki, Elm və Təhsil Nazirliyi ilə səmərəli əməkdaşlığın növbəti göstəricisi olan müsabiqənin mükafatlandırma mərasimi Bakı şəhər 1 nömrəli Uşaq-Gənclər İnkişaf Mərkəzinin (UGİM) rəsm qalereyasında təşkil edilib.
QHT və media nümayəndələrinin də iştirak etdiyi tədbirdə I yerin qalibi Bakı şəhər 2 nömrəli UGİM-in təmsilçisi Şükufə Zülfüqarova, II yerin qalibi Bakı şəhər 1 nömrəli UGİM-in təmsilçisi Safiya Əliyeva, III yerin qalibi isə Şəki şəhər 12 nömrəli tam orta məktəbin şagirdi Leyla Cabbarlı elan olunub.
Qaliblərə və fəal iştirakçılara müvafiq diplom, təşəkkürnamə və hədiyyələr təqdim edilib.
Bakı şəhər 1 nömrəli UGİM-in “Yol hərəkəti qaydaları” dərnək üzvlərinin mahnı və rəqsləri isə tədbirə xüsusi rəng qatıb.
Məlumata görə, ümumilikdə müsabiqəyə respublikanın 41 təhsil müəssisəsindən 200-dən çox əsər təqdim olunub.
Bölmənin digər xəbərləri
