ZAQATALADA 20 YANVAR ŞƏHİDLƏRİNİN XATİRƏSİ ANILMIŞDIR
Zaqatala, 19 yanvar (AZƏRTAC). Bəşər tarixində insanlığa qarşı törədilmiş ən ağır cinayətlərdən olan 20 Yanvar faciəsinin iyirminci ildönümü ilə əlaqədar yanvarın 19-da Zaqatala rayonunda silsilə tədbirlər, anma mərasimləri keçirilmişdir.
Rayon rəhbərliyi və ictimaiyyət nümayəndələri əvvəlcə şəhərdə 20 Yanvar şəhidlərinin xatirəsinə ucaldılmış abidənin qarşısında şəhidlərin ölməz xatirəsinə ehtiramlarını bildirmiş, önünə qırmızı qərənfillər düzmüşlər.
Sonra tədbir iştirakçıları rayonun Göyəm, Aşağı Tala və Qımır kəndlərində şəhidlərin xatirəsinə yeni inşa olunmuş xatirə komplekslərinin açılış mərasimlərində iştirak etmişlər. Mərasimlərdə rayon icra hakimiyyətinin başçısı Mübariz Əhmədzadə, şəhid anaları, kənd ağsaqqalları çıxış edərək 20 Yanvar faciəsinin qəhrəmanlıq və şəhidlik zirvəsi kimi, xalqımızın qan yaddaşına əbədi həkk olunduğunu bildirmiş, qanlı hadisələrdən iyirmi il keçməsinə baxmayaraq, həmvətənlərimizin o müdhiş gecəni daim xatırladıqlarını, bu vəhşiliyi törədənləri lənətlədiklərini xüsusi vurğulamışlar.
Daha sonra Zaqatala şəhərindəki “Qala düzü” istirahət mərkəzində 20 Yanvar faciəsinin ildönümünə həsr olunmuş elmi-praktiki konfrans keçirilmişdir. Tədbir iştirakçıları əvvəlcə 20 Yanvar hadisələrinə həsr olunmuş sənədli filmə baxmışlar.
Konfransda rayon icra hakimiyyətinin başçısı Mübariz Əhmədzadənin “Azadlıq uğrunda mübarizənin 20 Yanvar zirvəsi” mövzusunda məruzəsi dinlənilmişdir. Məruzəçi bildirmişdir ki, 20 il əvvəl - 1990-cı il yanvarın 20-də qaniçən sovet imperiyası ordusu Bakı şəhərində misli görünməmiş qətliam törətmişdir. Bu faciə xalqımıza qarşı törədilmiş ən dəhşətli cinayət, eyni zamanda, bəşər tarixinin ən qanlı terror aktlarından biri hesab olunur. Ümummilli liderimiz Heydər Əliyev sovet imperiyasının bütün hədə və qadağalarına baxmayaraq, 1990-cı il yanvarın 21-də Moskvada Azərbaycan nümayəndəliyinə gələrək xalqımıza qarşı törədilmiş bu qanlı cinayətin təşkilatçılarını və iştirakçılarını pisləyərək xüsusi bəyanat vermişdir. Bu bəyanat xalqımızın haqq səsini müdafiə edən və onun köməksiz olmadığını bütün dünyaya yayan cəsarətli bir addım idi.
Məruzədə qeyd olunmuşdur ki, məhz ulu öndərimizin yenidən hakimiyyətə qayıdışından sonra 20 Yanvar hadisələrinə hüquqi-siyasi qiymət verilmiş, qanlı faciənin bütün dünyaya tanıdılması üçün zəruri işlər görülmüşdür.
Tədbirdə, həmçinin “20 Yanvar hadisələrinin beynəlxalq əks-sədası” və “Azərbaycan xalqının qəhrəmanlıq salnaməsi” mövzularında məruzələr dinlənilmiş, mədəniyyət işçilərinin hazırladıqları ədəbi-bədii kompozisiya nümayiş etdirilmişdir.
20 Yanvar faciəsinin iyirminci ildönümü ilə bağlı tədbirlər planı çərçivəsində rayonun bütün yaşayış məntəqələrində, təhsil, səhiyyə və mədəniyyət müəssisələrində anma mərasimləri, konfranslar, foto və rəsm sərgiləri təşkil edilmiş, Olimpiya İdman Kompleksində yeniyetmələr arasında cüdo üzrə rayon birinciliyi keçirilmiş, habelə yerli yazar Mustafa Camalın “Bir kəndin şəhidləri” kitabının təqdimatı olmuşdur.
######
 |
 |
Bölmənin digər xəbərləri
