ZAQATALADA KOMMUNAL TƏYİNATLI YENİ TEXNİKANIN TƏQDİMATI OLMUŞDUR
AZƏRTAC-ın müxbiri xəbər verir ki, sentyabrın 4-də Zaqatalada şəhərə gətirilmiş kommunal təyinatlı yeni texnikanın təqdimatı olmuşdur.
İctimaiyyət nümayəndələri və Kommunal müəssisələri kombinatı işçilərinin iştirak etdikləri tədbirdə çıxış edən rayon icra hakimiyyətinin başçısı Asif Əsgərov bildirmişdir ki, ölkənin kommunal təsərrüfatının maddi-texniki bazasının yaxşılaşdırılması məqsədi ilə Azərbaycan Prezidenti İlham Əliyevin bilavasitə tapşırığına əsasən respublikamıza xeyli sayda kommunal təyinatlı yeni texnika və avadanlıq gətirilmişdir. Bu texnikadan paytaxtla yanaşı, respublikanın digər şəhər və rayonlarına da ayrılmışdır.
Zaqatalanın müasir şəhərsalma prinsipləri əsasında sürətlə inkişaf etdiyini xüsusi vurğulayan icra hakimiyyətinin başçısı əmin olduğunu bildirmişdir ki, yeni texnika Kommunal müəssisələri kombinatının işini yüngülləşdirəcək, daha da səmərəli edəcək, məişət tullantılarının yığılması və daşınması sahəsində mövcud problemləri aradan qaldıracaq, həmişə təmizliyi ilə seçilən şəhərin daha da gözəl görkəmdə olmasına müsbət təsir göstərəcəkdir.
Sonra Kommunal müəssisələri kombinatının işçilərinə pul mükafatları təqdim edilmiş, yeni texnikaya baxış olmuşdur.
######
 |
 |
