Elşən Əmrahov: Əminik ki, Qarabağın tacı olan Şuşa şəhəri tezliklə işğalçılardan təmizlənəcək
Masallı, 3 noyabr, Bağır Əliyev, AZƏRTAC
Hər zaman adı çəkiləndə gözlərimiz dolar, qəlbimiz qubar eylər. Adam öz isti ocağından necə ayrılar ki?! Həsrəti ilə yaşadığımız 28 il ərzində, hər gün dua etmişik ki, heç olmazsa, Allahın bizə nəsib etdiyi ömrün qalan hissəsini doğma yurd-yuvamızda - Şuşada yaşayaq...
Bu sözləri AZƏRTAC-ın bölgə müxbirinə müsahibəsində Masallı rayonunda məskunlaşan, Şuşa rayonunun Xanalılar kənd sakini Elşən Əmrahov söyləyib.
E.Əmrahov Şuşa şəhərindən ailəsinin köç etdiyi o ağır günləri böyük kədər hissi ilə xatırladı: “1992-ci il mayın 7-dən 8-nə keçən gecə... Çoxsaylı hərbi texnika və canlı qüvvə ilə təchiz edilmiş amansız işğalçıya müqavimət göstərə bilmədik. Silahsız idik. Gecələr postda durur, könüllü olaraq döyüşçülərə kömək etməyə çalışırdıq. Dayım oğlu Fikrət Hüseynov, əmim oğlu Bəxtiyar Əliyev kimi neçə qohumum, həmkəndlim son anacan igidliklə vuruşub, şəhid oldular...”.
Qırx doqquz yaşlı Şuşa sakini daha sonra deyib: “Cismimiz ayrılsa da, ruhumuz orda qaldı. Yalın camaat yurdundan çıxmağa məcbur oldu. May ayı olmasına baxmayaraq, dağlarda qar əriməmişdi. Mal-qara da orda qaldı. Uşaq, qadınlar yük maşınları ilə yola salındı. Mən Cənnət və Mirsiyab əmimlə (dünyalarını dəyişiblər), digər yerlilərimizlə birgə bir az gec çıxdıq kənddən. Mirzələr qış yatağında cəmləşən camaatla birgə Laçın-Qubadlı-Cəbrayıl istiqamətində 13 gün yol gəldik. İlk öncə İsmayıllının Xəlilli kəndinə köçsək də, Ağdamın işğalından sonra Şəkiyə getdik. 1993-cü ildən anam, iki bacım və mən Masallıda, Ərkivan qəsəbəsində məskunlaşmışıq”.
Uşaqlıqdan musiqiyə, özfəaliyyətə həvəsi olduğunu, məktəb tədbirlərində fəal iştirak etdiyini, şuşalılara xas o ilahi səsdən ona da pay düşdüyünü vurğulayan şuşalı sakin, bu səsdən bu gün müqəddəs “Qurani-Kərim”in qiraətində istifadə etdiyini, Şuşa Kənd Təsərrüfatı Texnikumunu bitirdikdən sonra bir müddət Qarabağ İpək Kombinatının 3 nömrəli toxuculuq sexinin filialında mexanik, müdir vəzifələrində çalışdığını diqqətə çatdırıb: “Şuşa şəhərində, eləcə də kəndimizdə Bakı Radioqurma İstehsalat Birliyinin 1 nömrəli istehsalatının filialı da fəaliyyət göstərirdi. Zümrüd anam 24 il rabitə sahəsində işləyib. 75 yaşında haqq dünyasına qovuşub, Masallının Ərkivan qəsəbəsində torpağa tapşırılıb. Atam ağac ustası olsa da, eyni zamanda bacarıqlı təsərrüfat sahibi idi. Mal-qaradan əlavə gözəl bağımız da vardı”.
Şuşada nişanlansa da, toyunun Masallıda keçirildiyini söyləyən Elşən müqəddəs Həcc ziyarətinə getdiyini, iki övladı olduğunu bildirib: “Oğlum Nicat Aprel döyüşlərinin iştirakçısıdır. Hazırda könüllü əsgər kimi Vətənə xidmət edir. Nicatın da ən böyük amalı, məqsədi Qarabağımızı, Aydın babasının (1934-1990) uyuduğu Xanalılar torpağını erməni terrorçularından azad etməkdir”.
Masallılardan həmişə isti məhəbbət gördüyünü söyləyən Elşən Əmrahov 28 ildir ki, ərkivanlılarla duz-çörək kəsdiyini deyib: “Yurdsuzluq, köçkünlük ağrılı yerimizdir. Bu dərdə, bu həsrətə son qoymaq üzrəyik. Sanki özüm üçün bitmiş kimi hesab etdiyim həyata yenidən qayıdacağam, Xanalıların mərkəzində yerləşən evimizə üz tutacağım gün, o torpağı öpə-öpə, qoxusunu ciyərlərimə çəkdiyim anlar yaxınlaşır. Atamın göz bəbəyi kimi qoruduğu meyvə bağını bərpa edəcəyim vaxtda, ruhunun şad olacağı məqamdakı yaşantımı, duyğularımı qabaqcadan ifadə etmək mümkün deyil...”.
Şuşanın zəngin flora və faunası - təmiz havası, bərəkətli torpağı, müxtəlif dərman bitkiləri, çiçəkləri, mineral su yataqlarından söhbət açan E.Əmrahov söhbətini nikbin notlarla tamamladı: “Quduz, insan qanına susayan bu erməni faşistlərinə etibar yoxdur. Atalar demişkən, itlə yoldaşlıq et, amma çomağını yerə qoyma. Uca Rəbbimizin lütfüdür ki, bu gün mənfur düşmənin son çırpıntılarıdır, O, qarşımızda qatlanıb...
Əminik ki, Müzəffər Ali Baş Komandanımızın qətiyyəti və iradəsi sayəsində, şanlı ordumuzun cəbhədə qazandığı ardıcıl qələbələrin davamı olacaq, Azərbaycanın dilbər guşəsi, Qarabağın tacı olan Şuşa, doğma Xanalılar kəndimiz tezliklə işğalçılardan təmizlənəcək. Qarabağ bizimdir! Qarabağ Azərbaycandır!”.
Bölmənin digər xəbərləri
