Şamaxı, 12 fevral, AZƏRTAC

Fevralın 12-də Şamaxıda “PROACT - Qayğı” layihəsinin icrasına başlanılıb.

AZƏRTAC-ın bölgə müxbiri xəbər verir ki, layihə COVID-19 infeksiyasının yayılması şəraitində vacib səhiyyə xidmətlərinin göstərilməsində baş verə biləcək çatışmazlıqların qarşısını almaq üçün ilkin səhiyyə sisteminin gücləndirilməsi məqsədi daşıyır. Habelə layihə Azərbaycan üçün məqsədəuyğun ilkin səhiyyə sistemi modelinin yaradılmasını nəzərdə tutur. Bu model genişləndirilərək ölkənin digər ərazilərində də tətbiq edilə bilər.

Ümumdünya Səhiyyə Təşkilatının (ÜST) Azərbaycandakı nümayəndəliyi tərəfindən həyata keçirilən layihə ABŞ Beynəlxalq İnkişaf Agentliyi (USAID), Böyük Britaniyanın “Ukaid”, Rumıniyanın “RoAid” təşkilatları və Universal Səhiyyə Əhatəsi Təşəbbüsü (ÜST-nin tərəfdaşları ilə ortaq layihəsi) tərəfindən maliyyələşdirilir.

ÜST-nin Azərbaycandakı nümayəndəliyi layihənin icra olunmasında Şamaxı Rayon İcra Hakimiyyəti, Səhiyyə Nazirliyi, İcbari Tibbi Sığorta üzrə Dövlət Agentliyi, TƏBİB, Heydər Əliyev Fondu, UNICEF və BMT-nin Əhali Fondu ilə tərəfdaşlıq edir.

Bu münasibətlə keçirilən tədbirdə layihə tərəfdaşları adından ÜST-nin Azərbaycandakı nümayəndəsi Hande Harmancı, Şamaxı Rayon İcra Hakimiyyətinin başçısı Tahir Məmmədov, USAID-in Azərbaycan üzrə missiyasının direktoru Caydev Sinqx, UNICEF-in Azərbaycandakı nümayəndəliyinin rəhbər müavini Min Yuan, Çarhan kənd tam orta məktəbin direktoru Afaq Orucova çıxış edərək, layihənin Şamaxı rayonu və digər yerlərdə ilkin səhiyyənin təkmilləşdirilməsi sahəsindəki müsbət təsirindən danışıblar. Milli Məclisin Səhiyyə komitəsinin üzvü, Heydər Əliyev Fondunun Beynəlxalq Əlaqələr Departamentinin rəhbəri Soltan Məmmədovun onlayn çıxışı da dinlənilib. Tədbirdə rayonun səhiyyə sistemi ilə bağlı məlumatların daha etibarlı və əlçatan olması məqsədilə hazırlanan geopolitik sistemin təqdimatı keçirilib. Layihənin təqdimatı və müzakirələrdən sonra Hande Harmancı, Min Yuan və Caydev Singx jurnalistlərə müsahibə veriblər.

Sonra tədbir iştirakçıları cari il fevralın 4-dən etibarən yerli tibb işçilərinə təlim keçməyə başlayan Şamaxı Təlim Mərkəzində də olublar. ÜST-nin texniki dəstəyi ilə UNICEF tərəfindən həyata keçirilən “PROACT - Təlim” layihəsi çərçivəsində yaradılan mərkəz mayın 15-dək fəaliyyət göstərəcək. Burada Şamaxı və ətraf rayonlardan olan 400 nəfərədək tibb işçisinə ilkin səhiyyə xidmətləri və COVID-19-a qarşı cavab tədbirləri sahəsində təlim keçiriləcək. Təlim mərkəzi daha sonra Şamaxı Rayon Mərkəzi Xəstəxanası nəzdində yerli təlim qurumu kimi fəaliyyətini davam etdirəcək.

“PROACT - Qayğı” layihəsinin tərəfdaşları daha sonra rayonun Çarhan və Quşçu kəndlərindəki kənd həkim məntəqələrinə gəliblər. Bu kəndlərdə yerli tibb işçiləri və əhali ilə tanış olmaq imkanı əldə edən layihə tərəfdaşları onların ilkin səhiyyə sahəsindəki ehtiyaclarını müzakirə ediblər.