1 NÖMRƏLİ ORTA MƏKTƏBİN MÜƏLLİMİ RAİDƏ İSMAYILOVANIN ÇIXIŞI
Yaşasın Yeni Azərbaycanın yeni siyasi lideri İlham Əliyev!
Yaşasın xoşbəxt gələcəyimizin təminatçısı İlham Əliyev!
Möhtərəm Baş nazir!
Hörmətli qonaqlar və Gəncə sakinləri!
İstərdim ki, hörmətli Baş nazirimizi ulu Gəncədə salamlayım, ona “Nizami yurduna xoş gəlmisən!” deyim.
XX əsr Azərbaycan xalqına öz dövlət müstəqilliyini bərpa etmək imkanı verdi. Bu əsr Azərbaycan xalqına, eyni zamanda, dünya şöhrətli siyasətçi, layiqli övlad Heydər Əliyevi bəxş etdi. Müqəddəs kitabımız Qurani-Kərimdə buyurulur ki, yüksək fəzilət sahiblərini Uca Tanrı yer üzünə özü göndərir, ona arxa və dayaq olur. Belələrinin heç bir tərifə, təbliğinə də ehtiyac yoxdur. “Ömrümün qalan hissəsini də xalqıma bağışlayıram” deyən müdrik şəxsiyyət cənab Heydər Əliyev məhz belə yüksək fəzilət sahibi, Tanrı adamıdır.
Möhtərəm görüş iştirakçıları!
Hörmətli İlham müəllim!
Mən Sizin Baş nazir kimi yüksək vəzifəyə təyin olunmağınızı gəncəlilər adından ürəkdən alqışlayıram. Sizə bu yolda möhkəm cansağlığı, Gəncənin xan çinarları qədər ucalıq, möhtəşəmlik, Azərbaycanın parlaq gələcəyi naminə yorulmaz fəaliyyətinizdə uğurlar diləyirəm. Qoy, Böyük Yaradan Sizin kimi el oğullarını, Vətən təəssübü çəkənləri daim bəd nəzərlərdən, pis gözlərdən, bəd niyyətli insanların pis əməllərindən qorusun. Tanrı sizə yar olsun!
Gəncəlilər uzun müddətdir ki, möhtərəm Baş nazirimizin səmərəli fəaliyyətini izləyir. Hörmətli Baş nazirimiz Azərbaycanın sözünü çox ləyaqətlə dünyaya çatdıra bilir. O, Ermənistanı işğalçı bir dövlət kimi bütün dünyaya tanıdıbdır. Şükürlər olsun ki, bu gün imzamız imzalar içindən, səsimiz səslər içindən gəlir. Bu gün Azərbaycanın haqq səsi dünyanın hər bir yerindən eşidilir.
Mən indi burada ana kitabımız “Kitabi-Dədə Qorqud”dan bir müdrik fikri yada salmaq istəyirəm: Yaxşı oğul atadan dərs alar. Bəli, cənab İlham Əliyev bir daha sübut edir ki, o, Heydər Əliyev siyasi məktəbinin ən layiqli varisi, ən layiqli davamçısıdır.
Hörmətli görüş iştirakçıları!
Mən böyük razılıq və məmnuniyyət hissi ilə bildirirəm ki, hörmətli Prezidentimiz 34 illik fəaliyyətinin bütün dövrlərində bizim şəhərimizə böyük qayğı və diqqət göstərmişdir. Bu gün Gəncə özünün intibah dövrünü yaşayır. Bu gün Gəncənin hər yeri güldür-çiçəkdir. Xüsusilə, möhtərəm Prezidentimizin 2002-ci ilin sentyabrında Gəncəyə məlum səfərindən sonra şəhərimiz öz libasını tamamilə dəyişmişdir. Bu gün Gəncədə həyat yeni axarda, yeni məcrada davam edir.
Hörmətli İlham müəllim, bu gün gəncəlilər şəhərə verilən qaz üçün, fasiləsiz işıq üçün məhz Sizə minnətdardırlar. Biz bilirik ki, bu, məhz Sizin yorulmaz fəaliyyətinizin nəticəsidir. “Heydər-Xalq”, “Xalq-Heydər” söyləyən qədirbilən Azərbaycan xalqına, onun siyasi liderinə eşq olsun!
Hörmətli İlham müəllim, gəncəlilər 1993-cü ilin o qorxunc, narahat günlərini unutmayıblar. Çünki buna bizim mənəvi haqqımız yoxdur. Belə bir məsəl var: keçmişini unudan millətin gələcəyi də yoxdur. Mən seçkidən-seçkiyə üzə çıxan “millət qəhrəmanlarına” üzümü tutub deyirəm: gəncəlilər 1993-cü ili yaddan çıxarmayıblar. O illəri ki, siz Gəncəni müharibə meydanına çevirmişdiniz. Bu ulu şəhəri ermənilərə təhvil vermək istəyirdiniz. Siz burada qardaş qanı tökdünüz. Analarımızın gözünü yaşlı qoydunuz. Bax, onda çökməkdə olan dövlətimizi, parçalanmaqda olan Vətənimizi qorumaq üçün xalq öz xilaskarına - Heydər Əliyevə üz tutdu və o nəhəng şəxsiyyət qəlbinin, ürəyinin hökmü ilə Azərbaycana gəldi, Gəncəyə gəldi.
Biz bu gün yenə seçim qarşısındayıq. Ancaq gəncəlilər birmənalı şəkildə bildirirlər ki, biz seçimimizi on il bundan əvvəl etmişik.
Yaşasın Azərbaycanın xoşbəxt gələcəyinin təminatçısı İlham Əliyev! Mən bu gün isa qəmbərlərə, etibar məmmədovlara üz tutub deyirəm: nəinki Gəncədə, heç Azərbaycanda sizin sosial bazanız yoxdur. Bu xalq əvvəlki xalq deyil.
Onların biri öz çıxışında demişdir ki, əgər mən prezident seçilərəmsə, Gəncəni paytaxt edəcəyəm. Mən onlara deyirəm, siz heç vaxt prezident seçilməyəcəksiniz. Gəncə həmişə möhtərəm Prezidentimizə məhəbbətin paytaxt şəhəri olmuşdur və indi də belədir. Ona görə ki, artıq möhtərəm Prezidentimizin qurduğu müstəqil, demokratik, hüquqi Azərbaycan yaşayır və bundan sonra da yaşayacaqdır. Onun gələcəyi etibarlı əllərdədir. Bəli, bu gün dövlətimiz çox etibarlı əllərdədir. Mən bir daha hörmətli Prezidentimizin müdrik bir sözünü yada salmaq istəyirəm: “Azərbaycan Respublikası bundan sonra onun başına nə gəlirsə gəlsin, heç bir dövlətin əsarəti altına keçməyəcəkdir, heç bir dövlətin tərkibinə qatılmayacaqdır. Onun müstəqilliyi dönməzdir, əbədidir”.
Azərbaycanın işıqlı, təmin olunmuş gələcəyinə inamla, güvənclə İlham Əliyevlə irəli!
ELDAR ƏZİZOV: Çox hörmətli Baş nazir, Gəncə sakinləri sizin ürək sözlərinizi səbirsizliklə gözləyir və məmnuniyyətlə eşitmək istəyirlər. X X X Baş Nazir İlham Əliyev görüşdə çıxış etdi.
Bölmənin digər xəbərləri
