20 NÖMRƏLİ MƏKTƏB-LİSEY YENİ GÖRKƏM ALMIŞDIR
 |
 |
 |
Burada ehtiramla qarşılanan Prezident İlham Əliyev və xanımı Mehriban Əliyeva məktəb-liseydə aparılmış yenidənqurma işləri ilə tanış oldular.
Son vaxtlar məktəbin əsaslı təmirinə böyük ehtiyac vardı. Bunu nəzərə alaraq, Prezident İlham Əliyev müvafiq göstəriş vermiş və bu ilin iyunundan məktəbdə əsaslı təmir işlərinə başlanmışdı. Hər biri dördmərtəbəli olan dörd korpusun hamısında təmir işləri görülmüş, bina yeni görkəm almışdır. 2900 şagird yerlik bu məktəbdə 106 sinif var. Burada iki növbədə 341 müəllim işləyir. Əsas korpusun girişində ümummilli lider Heydər Əliyevin həyat və fəaliyyətindən bəhs edən guşə yaradılmışdır. Burada Prezident İlham Əliyevin fəaliyyətindən, onun təhsilə göstərdiyi diqqət və qayğıdan, təhsildən, şagirdlərin hüquq və vəzifələrinə aid müxtəlif maarifləndirici materiallardan bəhs edən fotoguşə də vardır.
Prezident İlham Əliyev əsas korpusda yerləşən 8-ci və 11-ci siniflərdə dərslərin gedişi ilə maraqlandı. Respublikanın digər məktəblərində olduğu kimi, burada da hərbi hazırlıq fənni tədris edilir və bunun üçün lazımi dərs və tədris ləvazimatları var. Dövlətimizin başçısı uşaqların məktəb yaşlarından hərbi vətənpərvərlik ruhunda böyüməsinin vacibliyini söylədi.
Kompyuter otağına baş çəkən Prezident İlham Əliyev müəllimlərlə görüşüb onlarla söhbət etdi. O dedi ki, bu, Azərbaycanın ən gözəl məktəbidir. Həm ən böyük məktəb olub, həm də indi ən gözəl məktəbdir. Xarici və daxili görünüşünə görə fərqlənir. Mən həmişə deyirəm ki, uşaqlar yaxşı məktəbdə oxumalıdırlar və müəllimlər də yaxşı şəraitdə işləməlidirlər.
Bakı çox gözəl şəhərdir, amma indi daha da gözəldir. Biz səhər Buzovnanın Albalılıq yaşayış sahəsində, Şüvəlanda, Binədə olmuşuq və indi buraya gəlmişik. Hər yerdə - həm kəndlərdə, həm də şəhərlərdə, məktəblər və şərait belə olmalıdır. Özü də təkcə təhsildə yox, bütün sahələrdə olmalıdır.
İndi biz Bakının tarixi binalarını təmir etdiririk. Təkcə Bakıda deyil, bütün rayonlarda olan məktəblər təmir olunur. Respublika üzrə son illərdə 1200 məktəb tikilibdir. Bu, bizim gələcəyimizə qayğı deməkdir. Sizə cansağlığı arzulayıram. Mən çox şad oluram ki, işlər yaxşı gedir, insanların üzü gülür. Çalışıram ki, ölkəmiz daha da inkişaf etsin, insanlar daha da yaxşı yaşasınlar.
Müəllimlər dövlətimizin başçısına təşəkkür edərək dedilər ki, cənab Prezident, çox sağ olun, Allahın nəzəri Sizin üstünüzdə olsun, həmişə var olasınız. Müəllimlərə, təhsilə böyük qayğı göstərirsiniz. Bütün kollektiv Sizə minnətdardır. İndi hər yan abadlaşır, yeni görkəm alır. Biz çox sevinirik, şad oluruq.
Prezident İlham Əliyev və Mehriban xanım Əliyeva pedaqoji kollektivin üzvləri ilə xatirə şəkli çəkdirdikdən sonra idman kompleksi ilə tanış oldular. Məktəbin 7800 kvadratmetr ərazisi olan həyətində mini futbol və basketbol meydançaları da yaradılıbdır. Qapalı idman salonu bütün zəruri avadanlıqla təchiz olunubdur. Həyətdə geniş abadlıq işləri aparılmış, yaşıllıq zonası salınmışdır.
Prezident İlham Əliyev məktəbin kollektivi ilə səmimiyyətlə sağollaşdı, işlərində uğurlar arzuladı.
Bölmənin digər xəbərləri
