20 Yanvar Azərbaycan xalqının qəhrəmanlığının və birliyinin təcəssümüdür
Bakı, 19 yanvar, AZƏRTAC
Azərbaycan Milli Elmlər Akademiyasının (AMEA) Gəncə Bölməsində xalqımızın qan yaddaşına əbədi həkk olunmuş 20 Yanvar faciəsinin 28-ci ildönümü ilə əlaqədar tədbir keçirilib.
AMEA-dan AZƏRTAC-a bildirilib ki, əvvəlcə Azərbaycanın müstəqilliyi və ərazi bütövlüyü uğrunda canlarından keçmiş şəhidlərin əziz xatirəsi birdəqiqəlik sükutla yad edilib.
Tədbirdə bölmənin sədri, akademik Fuad Əliyev 1990-cı ilin yanvarında sovet imperiyasının Azərbaycanda müstəqillik və azadlıq uğrunda mübarizəyə qalxmış dinc əhaliyə qarşı törətdiyi cinayətlərdən danışıb, 20 Yanvar faciəsinin xalqımızın yaddaşında silinməz izlər buraxdığını vurğulayıb. Diqqətə çatdırılıb ki, 20 Yanvar Azərbaycan xalqının qəhrəmanlığının və birliyinin təcəssümüdür. F.Əliyev gəncləri tariximizin bu qanlı qəhrəmanlıq səhifəsini unutmamağa çağırıb.
Tədbirdə bölmənin Diyarşünaslıq İnstitutunun tarix şöbəsinin müdiri, professor Həsən Sadıqov, elmi işçiləri Mətanət Əliyeva və Aytən İsmayılova, Bioresurslar İnstitutunun boyaq emalı texnologiyası laboratoriyasının rəhbəri, kimya üzrə fəlsəfə doktoru, dosent İmran Qasımov və başqaları çıxış edərək 20 Yanvar hadisələri barədə geniş məlumat verib, həmin gecənin Azərbaycan tarixində təkcə faciə deyil, həm də milli məfkurəmizin azadlıq istəyinin oyanış günü olduğunu vurğulayıblar.
Sonda 20 Yanvar faciəsi ilə bağlı sənədli film nümayiş etdirilib.
Bölmənin digər xəbərləri
