20 Yanvar Azərbaycanın milli azadlıq hərəkatının yüksəliş günüdür
Naxçıvan, 19 yanvar, AZƏRTAC
1990-cı il yanvarın 19-dan 20-nə keçən gecə törədilən qanlı faciə istiqlaliyyət, suverenlik və müstəqillik uğrunda ayağa qalxmış Azərbaycan xalqının apardığı mübarizənin şərəfli səhifəsidir.
Bu fikirlər Yeni Azərbaycan Partiyası Kəngərli rayon təşkilatının Yeni Kərki kənd mərkəzində 1990-cı il 20 Yanvar faciəsinin 28-ci ildönümünə həsr olunmuş anım mərasimində səsləndirilib.
Mərasim iştirakçıları əvvəlcə Azərbaycanın istiqlaliyyəti və müstəqilliyi uğrunda canlarından keçən şəhidlərin xatirəsini bir dəqiqəlik sükutla yad ediblər.
Tədbirdə çıxış edən Yeni Azərbaycan Partiyası rayon təşkilatının sədri, Naxçıvan Muxtar Respublikası Ali Məclisinin deputatı Sevda Quliyeva bildirib ki, ən ağır sınaqlara sinə gərmək əzmini bütün dünyaya nümayiş etdirən Azərbaycan övladları 1990-cı il yanvarın 20-də xalqımızın qəhrəmanlıq salnaməsinə parlaq səhifə yazdılar. Sovet imperiyası rəhbərliyinin 20 Yanvar faciəsini törətməkdə məqsədi Azərbaycan xalqının müstəqillik uğrunda apardığı mübarizənin qarşısını almaq, milli azadlıq hərəkatına zərbə vurmaq idi. Həmin gecə 147 nəfər Azərbaycan vətəndaşı şəhid olub, 744 nəfər yaralanıb və xəsarət alıb, 841 nəfər qanunsuz həbs edilib.
“20 Yanvar hadisələri və xalqımızın başına gətirilmiş faciələr haqqında həqiqətlərin dünya ictimaiyyətinə çatdırılmasında ulu öndər Heydər Əliyevin xidmətləri misilsizdir. Bu faciə ilə bağlı etiraz səsini ilk olaraq Moskvada xalqımızın böyük oğlu ucaldıb. Hadisələrin ertəsi günü Azərbaycanın Moskvadakı nümayəndəliyinə gələn Ümummilli Lider Azərbaycan xalqına qarşı törədilmiş cinayətin təşkilatçılarının və icraçılarının cəzalandırılmasını tələb edib”, - deyən Sevda Quliyeva bildirib ki, ulu öndər Heydər Əliyev bununla, ilk növbədə, vətəndaşlıq borcunu yerinə yetirib, milli mövqeyini nümayiş etdirib.
Ümummilli lider Heydər Əliyev ölkə rəhbərliyinə qayıtdıqdan sonra 1994-cü ildə ilk dəfə 20 Yanvar hadisələrinə siyasi-hüquqi qiymət verilib və cinayəti törədənlərin adları ictimaiyyətə açıqlanıb.
Sevda Quliyeva qeyd edib ki, 20 Yanvar şəhidləri, şəhid ailələri, əlil olan insanlar bu gün də unudulmur, onların sosial təminatının gücləndirilməsi Azərbaycan Prezidenti İlham Əliyevin daim diqqət mərkəzindədir. Ölkəmizin hər yerində olduğu kimi, muxtar respublikada da bu istiqamətdə ardıcıl tədbirlər həyata keçirilir.
Tədbirdə Yeni Azərbaycan Partiyası rayon təşkilatının sədr müavini, Naxçıvan Muxtar Respublikası Ali Məclisinin deputatı Ehtimad Məmmədov, təşkilatın şura üzvü Tahir Məmmədov, Yeni Kərki kənd ərazi ilk partiya təşkilatının sədri Ülviyyə Taharova, Yeni Kərki kənd tam orta məktəbinin direktoru Təhminə Hümbətova çıxış edərək bildiriblər ki, 20 Yanvar tariximizin qəhrəmanlıq səhifəsi, Azərbaycanın milli azadlıq hərəkatının yüksəliş günüdür.
Sonra məktəblilər 20 Yanvar faciəsinə həsr olunmuş şeirlər söyləyiblər. Faciədən bəhs edən videomaterial nümayiş olunub.
X X X
Azərbaycanın müasir tarixinə xalqımızın qəhrəmanlıq səhifəsi kimi daxil olan 20 Yanvar hadisələrinə yalnız ümummilli lider Heydər Əliyevin ölkə rəhbərliyinə qayıdışından sonra 1994-cü ildə siyasi-hüquqi qiymət verilib.
Bu barədə Naxçıvan Dövlət Universitetində keçirilən “20 Yanvar faciəsi tariximizin şərəf və qəhrəmanlıq səhifəsidir” adlı elmi-praktik konfransda bəhs edilib.
Əvvəlcə universitet tələbələrinin qanlı faciəyə həsr olunmuş rəsm əsərlərindən ibarət sərgiyə baxış keçirilib.
Təsviri incəsənət kafedrasının müdiri, Azərbaycan Respublikasının Xalq Rəssamı Hüseynqulu Əliyev əsərlər haqqında məlumat verib. Sərgidə keçmiş sovet qoşunlarının ölkəmizə yeridilməsinin acı nəticələrini və dinc əhaliyə qarşı törədilmiş amansız cinayətləri özündə əks etdirən əsərlər yer alıb.
Konfransda əvvəlcə Azərbaycan Respublikasının Dövlət Himni səsləndirilib, sonra şəhidlərin xatirəsi bir dəqiqəlik sükutla yad olunub.
Universitetin rektoru, AMEA-nın müxbir üzvü Saleh Məhərrəmov tədbiri açaraq 28 il əvvəl müstəqillik və suverenlik uğrunda mübarizəyə qalxmış xalqımızın başına gətirilən faciədən danışıb.
Azərbaycan tarixi kafedrasının dosenti Nadir Hüseynbəyli çıxışında bildirib ki, 1990-cı il yanvarın 19-dan 20-nə keçən gecə Bakı şəhərinə keçmiş Sovet İttifaqının qoşun hissələrinin yeridilməsi nəticəsində dinc əhaliyə divan tutulub, onlarla insan öldürülüb. Bakıda və Azərbaycanın rayonlarında hərbi qulluqçular tərəfindən 200 ev və mənzil, 80 avtomaşın, o cümlədən təcili yardım maşınları gülləboran edilib, dövlət əmlakı və şəxsi əmlak məhv olunub.
Tədbirin ədəbi-bədii hissəsində tələbələrin ifasında şəhidlərə həsr olunmuş şeirlər və mahnılar səsləndirilib.
Sonda 20 Yanvar faciəsinə dair film nümayiş olunub.
AZƏRTAC-ın Naxçıvan Muxtar Respublikasındakı bürosu
Bölmənin digər xəbərləri
