20 Yanvar faciəsi insanlığa qarşı törədilmiş ən ağır cinayətlərdən biridir
Bərdə, 19 yanvar, Tahir Ağaməmmədov, AZƏRTAC
Azərbaycan xalqının qan yaddaşına əbədi həkk olunmuş 20 Yanvar faciəsinin 28-ci ildönümü respublikamızın hər yerində olduğu kimi, Qarabağ bölgəsində də böyük ehtiramla yad edilir. Faciənin ildönümü münasibətilə idarə və təşkilatlarda, təhsil müəssisələrində anım tədbirləri keçirilir, sərgilər təşkil olunur.
AZƏRTAC-ın bölgə müxbiri xəbər verir ki, Bərdə Rayon Gənclər və İdman İdarəsinin Dövlət İdarəetmə və Texnologiya Kolleci ilə birgə təşkil etdiyi tədbir “20 Yanvar faciəsi tariximizin şərəf və qəhrəmanlıq səhifəsidir” mövzusuna həsr edilib. Kollecin müəllimi, aqrar elmlər üzrə fəlsəfə doktoru Xosrov Musayev çıxış edərək, 28 il əvvəl Bakıda həyata keçirilən qanlı hadisələrdən söz açıb. Bildirib ki, 1990-cı il yanvarın 19-dan 20-nə keçən gecə sovet ordusunun Azərbaycan xalqına qarşı həyata keçirdiyi təcavüz insanlığa qarşı törədilmiş ən ağır cinayətlərdən biri kimi yaddaşlarda qalacaq. Milli azadlıq və ərazi bütövlüyü uğrunda mübarizəyə qalxmış dinc əhaliyə divan tutulması nəticəsində yüzlərlə günahsız insanın qətlə yetirilməsi və yaralanması totalitar sovet rejiminin süqutu ərəfəsində onun cinayətkar mahiyyətini bütün dünyaya bir daha nümayiş etdirdi.
Gənclər və İdman İdarəsinin rəisi Anar Şahbazov qanlı Yanvar hadisələrinə siyasi-hüquqi qiymət verilməsində, faciənin günahkarlarının üzə çıxarılmasında, şəhidlərin adının əbədiləşdirilməsində ümummilli lider Heydər Əliyevin əvəzsiz tarixi xidmətlərindən danışıb. Diqqətə çatdırıb ki, ulu öndər Heydər Əliyev hadisənin ertəsi günü Moskvada Azərbaycanın daimi nümayəndəliyinə gələrək keçirdiyi mətbuat konfransında bu vəhşiliyi qətiyyətlə pisləməklə yanaşı, onun təşkilatçılarının və günahkarlarının adını bütün dünyaya bəyan etdi.
İdarənin rəis müavini Aydın Qasımov bildirib ki, sovet hərbçiləri 1990-cı ilin yanvar hadisələri ilə Azərbaycan xalqının iradəsini, milli azadlıq uğrunda mübarizə əzmini qıra bilmədi. Həmin gecə həlak olan Vətən oğulları Azərbaycanın tarixinə parlaq səhifə yazdılar, xalqın milli azadlığı, müstəqilliyi üçün yol açdılar. Yanvarın 20-si müstəqil Azərbaycan tarixinə xalqımızın şərəf və qəhrəmanlıq səhifəsi kimi yazıldı.
X X X
Bərdə şəhər 5 nömrəli tam orta məktəbdə keçirilən tədbirin iştirakçıları əvvəlcə 20 Yanvar şəhidlərinin xatirəsini bir dəqiqəlik sükutla yad ediblər.
AZƏRTAC-ın bölgə müxbiri xəbər verir ki, rayon Gənclər və İdman İdarəsinin rəis müavini Aydın Qasımov, İctimai Televiziyanın Qarabağ bölgəsi üzrə müxbiri, Qarabağ müharibəsi veteranı Şöhrət Eyvazov və məktəbin müəllimləri çıxış edərək, xalqımızın azadlıq mübarizəsindən, 20 Yanvar faciəsinin səbəblərindən və ağır nəticələrindən danışıblar. Bildirilib ki, 20 Yanvar uzun illər sovet imperiyasının əsarətində yaşayan xalqın azadlıq səsini ucaltdığı, öz suverenliyi uğrunda ayağa qalxdığı şərəfli bir tarixdir.
Tədbirdə şagirdlərin hazırladıqları ədəbi-bədii kompozisiya göstərilib.
X X X
Beyləqan rayonu ərazisində məskunlaşmış xocavəndli məcburi köçkünlər də 20 Yanvar faciəsi qurbanlarının xatirəsini əziz tuturlar. Xocavənd Rayon İcra Hakimiyyəti, Uşaq-Gənclər İdman və Şahmat Məktəbi, Gənclər və İdman İdarəsinin birgə təşkilatçılığı ilə Tuğ kənd tam orta məktəbində 20 Yanvar şəhidlərinin xatirəsinə həsr olunmuş oğlan və qızlar arasında şahmat üzrə rayon birinciliyi keçirilib.
AZƏRTAC-ın bölgə müxbiri xəbər verir ki, tədbirdə respublikamızın müstəqilliyi və ərazi bütövlüyü uğrunda canından keçən Vətən övladlarının xatirəsi yad edilib. Çıxış edənlər 1990-cı il yanvarın 20-də Bakıda törədilmiş faciədən, Vətənin azadlığı və ərazi bütövlüyü uğrunda canlarından keçən həmvətənlərimizin mübarizliyindən danışıb, qanlı hadisənin xalqımızın qəhrəmanlıq tarixinin parlaq səhifəsi olduğunu bildiriblər.
20 Yanvar şəhidlərinin əziz xatirəsini yad etmək, rayonda şahmatı daha da inkişaf etdirmək və təbliğ etmək, məktəbli şahmatçılar arasında idman və dostluq əlaqələrini möhkəmləndirmək, perspektivli şahmatçıları aşkar etmək məqsədi ilə keçirilən yarışda 72 nəfər mübarizə aparıb.
Yarışın yekununda qaliblər diplomlarla təltif olunub.
X X X
20 Yanvar faciəsinin 28-ci ildönümü Ağcabədi rayonunda silsilə tədbirlərlə qeyd edilir.
AZƏRTAC-ın bölgə müxbiri xəbər verir ki, Ağcabədi şəhərindəki Heydər Əliyev Mərkəzində yanvarın 18-dən “Qanla qazanılmış azadlıq” adlı sərgi açılıb. Sərgidə faciəni özündə əks etdirən tarixi fotolar, sənədlər, kitab və jurnallar nümayiş olunur.
Rayon məktəblərində təhsil alan şagirdlərə Mərkəzin əməkdaşları tərəfindən fotolar və sənədlər əsasında faciə haqqında ətraflı məlumat verilir.
Sərgi yanvarın 21-dək davam edəcək.
Bölmənin digər xəbərləri
